Բանակը պետք է մտնի քաղաք, եթե ժողովրդի դեմ ուժ կիրառեն. հանրության մեծ մասը բանակի կողքին է, դեմ է լինելու Փաշինյանի 20 % ընտրազանգվածը. Ստեփան Դանիելյան

Ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը երեկ Կառավարության շենքում հանդիպել է Նիկոլ Փաշինյանին և նրա հետ քննարկել արտահերթ խորհրդարանական ընտրություններ անցկացնելու  հարցը։

Հանդիպումից հետո Մարուքյանը լրագրողների հետ զրույցում ասաց, որ, թեև, իրեն չի հաջողվել Փաշինյանի հետ համաձայնության գալ ԳՇ պետ Օնիկ Գասպարյանին աշխատանքից չազատելու իր պայմանի շուրջ, սակայն կլինի քննարկումների երկրորդ փուլ՝ արտահերթ խորհրդարանական ընտությունների վերաբերյալ։ Ինչ վերաբերում է խորհրդարանական մյուս՝ «Բարգավաճ Հայաստան» խմբակցությանը, ապա այսօր խմբակցության պատգամավոր Իվետա Տոնոյանը  խորհրդարանական ճեպազրույցների  ժամանակ ասաց, որ դեռևս Փաշինյան-Ծառուկյան հանդիպման վերաբերյալ քննարկում իրենց խմբակցությունում չի եղել։

168 TV-ի «Ռեվյու» հաղորդաշարի եթերում, խոսելով Փաշինյանի՝  հրապարակ նետված արտահերթ խորհրդարանական ընտրություններ անցկացնելու թեզի մասին, քաղաքագետ Ստեփան Դանիելյանն ասաց, որ վստահ է՝ Փաշինյանն ընտրություն անել չի ուզում։

«Ես չեմ կարծում, որ իշխանության նպատակը արտահերթ խորհրդարանական ընտրություններ անցկացնելն է։ Նրանք ցանկանում են իրավիճակը մի կերպ պահել և  հասնել մինչև 2023 թվականը, սակայն, եթե հիմա իշխանությունը  դրսևորում է նման ցանկություն, ապա դա անում է ստիպված. հիմա խնդիր է դրված, որ արտահերթ ընտրության ժամանակ այս անձը (Նիկոլ Փաշինյան.- Ա.Ս.) մնա վարչապետ, որպեսզի հետաձգի  հարցերի պատասխանները, որոնք կուտակված են համապատասխան հետևանքներով, իհարկե, փորձում է նաև օգտվել անձեռնմխելիությունից»,- ասաց Ստեփան Դանիելյանը։

Հարցին՝ կհաջողվի՞ արդյոք Փաշինյանին արտահերթ խորհրդարանական ընտրություն անցկացնելու համաձայնություն ձեռք բերել «Բարգավաճ Հայաստան» և «Լուսավոր Հայաստան» խմբակցությունների հետ, Դանիելյանը պատասխանեց, որ այդ համաձայնությունը Փաշինյանին պետք է առաջին հերթին իր թիմի ներսում փլուզումը կանխելու համար, որովհետև վստահ է, որ եթե այլ թեկնածու առաջադրվի, իր թիմի անդամները նրան կողմ կքվեարկեն ու կազատվեն վերջապես իրենից։

Ինչ վերաբերում է Փաշինյանի մասնակցությամբ ընտրությունների ժամանակ նրա վերարտադրման հավանականությանը, ապա Դանիելյանը շեշտեց՝ իշխանության բարոյականության վերաբերյալ որևէ կասկած չունի՝ կգնան ամեն քայլի։

«Նրանք կփորձեն օգտագործել ադմինիստրատիվ ռեսուրսը, կփորձեն փող բաժանել, կոմպրոմատների կդիմեն։ Այս իշխանություններն ավելին կանեն, քան նախկին իշխանություններն են արել,  բայց այստեղ հարց է առաջանում՝ արդյո՞ք կհաջողվի։

Ես կարծում եմ՝ ընտրակեղծարարությունը շատ բարդ մեխանիզմ է, որին մասնակից են դառնում հազարավոր մարդիկ, ներգրավված է և՛ ոստիկանությունը, և՛ Ազգային անվտանգության ծառայությունը, և՛ դատական համակարգը, և՛ տեղական ինքնակառավարման մարմինները։ Այս բոլորը հետո ոչ միայն անպատիժ են մնում, այլև ստանում են իրենց հասանելիքները՝ պաշտոնների տեսքով։ Արդյո՞ք այս իշխանությունը կկարողանա այդ մեխանիզմն աշխատեցնել, չէ՞ որ  մենք տեսնում ենք, որ եթե ոստիկանության վերնախավը դեռ լոյալ է, ապա ներքին օղակներում անընդհատ տեղի են ունենում արտահոսքեր։

Մյուս կողմից՝ դատական համակարգն է անկախ.  մեր վատագույն ղեկավարի օրոք դատական համակարգը սկսեց անկախանալ, հիմա որևէ մեկը վստահ չի լինելու, որ կեղծիքների վերաբերյալ դատարանը վճիռներ չի կայացնելու։

Այս իշխանությունը խնդիր ունի նաև տեղական ինքնակառավարման մարմիններում,  որտեղ փոխմարզպետների մի մասը հրաժարական է տալիս, մյուս մասը սպասման մեջ է։ Իշխանությունը կորցրել է նաև բանակը.  ում էլ ուզեն հետո դնեն Գլխավոր շտաբի պետ, միևնույն է, բանակն այս  իշխանության  համար չի աշխատելու։

Մի շատ կարևոր հանգամանք ևս. այդ մեքենան, որն աշխատելու է ընտրակեղծարարության համար, պետք է ունենա երաշխիք, որ այս իշխանությունը կվերարտադրվի, իսկ այդ երաշխիքը չկա, որովհետև նախկինում կար նախագահի ինստիտուտ, որը դառնում էր ընտրությունների ժամանակ այդ համակարգի երաշխավորը, իսկ եթե  նախագահի ընտրություն էր լինում, խորհրդարանն էր դառնում այդ երաշխիքը, իսկ այսօր այդ երաշխիքները չկան»,- ասաց Ստեփան Դանիելյանը՝ այս հանգամանքներին նաև ավելացնելով մեկը՝ պատերազմի ավարտից հետո գործող իշխանության ներկայացուցիչները՝ ընդհուպ Նիկոլ Փաշինյանը, միայնակ փողոց դուրս գալու խնդիր ունեն։

Քաղաքագետը ստեղծված իրավիճակում հրատապ համարեց գործող իշխանության հեռացումը՝ շեշտելով՝ եթե վիճակը հասել է այն աստիճանի, որ երկիրը կանգնած է կործանման եզրին, իսկ դա պետւթյան համար վերջնակետն է, ապա  պետք է չհեռացող իշխանությանն ուղղակի հեռացնել։

«Գլխավոր շտաբն իր հայտարարության մեջ երկու միտք է արտահայտել. Առաջինը՝ պետության անվտանգությունը վտանգված է, և պահանջում է այս իշխանության հրաժարականը, երկրորդը՝ թույլ չի տա ժողովրդի դեմ ուժ կիրառել, ուստի, եթե  ժողովրդի դեմ ուժ կիրառեն, բանակը պետք է մտնի քաղաք. դրան հանրության մեծ մասը  կողմ է լինելու, կողջունի, հանրության մեծ մասը բանակի կողմն է»,- ասաց Դանիելյանը՝ նշելով, որ բանակի կողմից իրականացվող այդ գործողություններին դեմ կլինի միայն Փաշինյանի իրական ընտրազանգվածը՝ հանրության 20 տոկոսը, որոնք կողմ են Թուրքիայի և Ադրբեջանի հետ եղբայրաբար ապրելուն։

Հարցազրույցի մանրամասները՝ տեսանյութում