Թրամփը խոստացել է «հանգիստ չթողնել» Բայդենի վարչակազմին
ԱՄՆ-ի նախագահ Դոնալդ Թրամփը հունվարի 12-ին խոստացել է, որ ինքը չի հաշտվի իշխանությունն ընտրված նախագահ Ջո Բայդենի թիմին փոխանցելու հետ։
«Սահմանադրության 25-րդ ուղղումն ինձ համար զրոյական ռիսկ է ներկայացնում, բայց մենք կվերադառնանք եւ հանգիստ չենք թողնի Ջո Բեյդենին ու նրա վարչակազմին»,-ասել է նա՝ իր հակառակորդներին խորհուրդ տալով՝ «զգուշություն դրսեւորել»:
Նաեւ Թրամփը հայտարարել է, որ ամերիկացիների խոսքի ազատության իրավունքը ներկայում ենթարկվում է ավելի կոշտ հարձակումների, քան եղել է ավելի վաղ: Հունվարի 6-ին Դոնալդ Թրամփի կողմնակիցները ներխուժել են Վաշինգտոնում Կապիտոլիումի շենք, որտեղ նիստ էր հրավիրել Կոնգրեսը. անկարգությունների արդյունքում առնվազն հինգ մարդ է զոհվել:
Կապիտոլիումում կոնգրեսականներն այդ պահին զբաղված էին քվեատուների կոլեգիայի քվեարկության արդյունքների հաստատմամբ, որոնց համաձայն, նախագահական ընտրությունների հաղթող է դարձել Ջո Բայդենը: Կոնգրեսի նիստը ընդհատվել է, կոնգրեսականների մի մասը տարհանվել է: Երբ Կապիտոլիումում հաջողվել է վերականգնել կարգուկանոնը, ԱՄՆ-ի Ներկայացուցիչների պալատը եւ Սենատը հաստատել են Բայդենի հաղթանակը: Այժմ դեմոկրատները փորձում են իշխանությունից հեռացնել Թրամփին՝ չսպասելով նրան փոխարինող Ջո Բայդենի՝ հունվարի 20-ին կայանալիք պաշտոնակալությանը:
Այսպես, ԱՄՆ-ի Կոնգրեսի Ներկայացուցիչների պալատում հունվարի 11-ին բանաձեւ են ներկայացրել, որում կոնգրեսականները կոչ են անում փոխնախագահ Մայք Փոմպեոյին՝ օգտվել ԱՄՆ-ի Սահմանադրության 25-րդ ուղղումից Դոնալդ Թրամփին իշխանությունից հեռացնելու համար:
25-րդ ուղղումը հնարավոր է համարում պետության ղեկավարի հեռացման գործընթաց սկսելը, եթե փոխնախագահը եւ վարչակազմի բարձրաստիճան աշխատակիցների մեծամասնությունն այն եզրակացության գան, որ նախագահը չի կարող կատարել իր գործառույթները: Այս դեպքում փոխնախագահը կզբաղեցնի նախագահը տեղը, հաղորդել է «Ինտերֆաքս»-ը:
