Ավելի քան 10 երկիր ուսումնասիրում է Ռուսաստանի փորձը COVID-19-ի դեմ պատվաստանյութի գրանցման համար
Ռուսաստանի ուղղակի ներդրումների հիմնադրամի (ՌՈՒՆՀ) ավելի քան տասը գործընկեր երկրներ ուսումնասիրում են Ռուսաստանի փորձը COVID-19-ի դեմ իրենց պատվաստանյութերի արագացված գրանցման համար: Այդ մասին հայտնել է ՌՈւՆՀ-ի գլխավոր տնօրեն Կիրիլ Դմիտրիեւը:
Նրա խոսքով՝ նրանց համար հետաքրքրություն է ներկայացնում «ստուգված որոշումը, օրինակ, մարդու ադենովիրուսի կիրառումը, ինչպես դա ռուսաստանցի գիտնականներն արել են Sputnik V պատրաստուկն ստեղծելիս:
«Չինաստանում կորոնավիրուսային վարակի դեմ Sinovac պատվաստանյութի արագացված ընթացակարգով գրանցումը արտակարգ իրադրության դեպքերի համար (emergency use) ցույց է տալիս, որ բազմաթիվ երկրներ այդ հարցում ընթանում են Ռուսաստանի ճանապարհով: Չինաստանն սկսում է իր բժիշկներին եւ ուսուցիչներին պաշտպանել ռուսաստանյան նմուշով՝ պատվաստանյութը ներկայացնելով բարձր ռիսկի խմբերի համար»:
Օգոստոսի սկզբին Պուտինը հայտարարել է, որ Ռուսաստանը գրանցել Է կորոնավիրուսի դեմ աշխարհում առաջին պատվաստանյութը: Այն մշակվել է Գամալեյայի անվան կենտրոնում՝ Ռուսաստանի ուղղակի ներդրումների հիմնադրամի հետ համատեղ: Մասնագետները քանիցս ընդգծել են, որ բոլոր կամավորների (18-ից մինչեւ 60 տարեկան) մոտ պատվաստանյութի փորձարկումները մշակել են SARS-CoV-2-ի նկատմամբ հակամարմինների բարձր տիտրեր, նրանցից ոչ ոքի մոտ լուրջ բարդություններ չեն դիտվել: Այն կոչվել է Sputnik V:
Դա լուծույթ է՝ միջմկանային ներարկման համար: Պլանավորում են պատվաստել երկու փուլով՝ երեք շաբաթ ընդմիջումով: Այսպիսի սխեման, հայտարարել են առողջապահության նախարարությունում, թույլ է տալիս իմունիտետ ձեւավորել մինչեւ երկու տարի ժամկետով: ՌՈւՆՀ-ի ղեկավար Կիրիլ Դմիտրիեւը հայտնել է, որ հիմնադրամն ավելի քան 20 երկրից 1 միլիարդ չափաբաժին գնելու հայտ է ստացել:
Նա նշել է, որ Ռուսաստանը պատվաստանյութի արտադրության շուրջ պայմանավորվել է հինգ երկրների հետ, առկա հզորությունները թույլ են տալիս մեկ տարում արտադրել մինչեւ 500 միլիոն չափաբաժին, հաղորդել է ՌԻԱ Նովոստին:
