ԿԳՄՍՆ-ն լուծում չի առաջարկել. Աննա Կոստանյանը՝ բուհ չընդունվածների խնդրի կարգավորման մասին
Այսօր ԱԺ Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովը ԳԹԿ և ԿԳՄՍՆ ներկայացուցիչների մասնակցությամբ քննարկում էր հրավիրել: Օրակարգում էր ԿԳՄՍՆ որդեգրած քաղաքականությունը, որի արդյունքում բարձր ստացած դիմորդները դուրս են մնացել համալսարանից, իսկ 7.5-8 ստացած դիմորդներն ընդունվել են, քանի որ գերակայությունը տրվել է առաջին հայտին:
ԱԺ «Լուսավոր Հայաստան» խմբակցության պատգամավոր Աննա Կոստանյանը լրագրողների հետ զրույցում ասաց, որ քննարկման արդյունքում որևէ որոշում չի կայացվել:
«Որևէ որոշում չէր կարող կայացվել, քանի որ որոշում կայացնող մարմնի ներկայացուցիչն առնվազն փոխնախարարի, նախարարի մակարդակով ներկա չէր, ներկա էր վարչության պետը, որն այս պահին կարող էր տալ միայն այնպիսի մեկնաբանություններ, որը մենք տեսնում ենք ԶԼՄ-ներով, որի մասին բոլորս էլ տեղյակ էին: Այսինքն՝ այնպես չէ, որ պատգամավորները թերինֆորմացված էին, պետք էր գալ ինֆորմացիա տալ: Վերջնական լուծում չեն առաջարկել»,- ասաց Կոստանյանը:
Պատգամավորի խոսքով՝ իրենք ակնկալում էին, որ նախարարության ներկայացուցիչը կգա փաթեթով լուծման, ինչը չի եղել: Իրենք ներկայացրել են խնդրի լուծման իրենց տարբերակները, որոնք գեներացվել են ծնողների առաջարկներից: Հիշեցնենք՝ ծնողներն առաջարկում էին ֆակուլտետներում նոր տեղեր բացել, կամ երեխաներին տեղավորել գոնե հեռակայում: Կոստանյանը նաև նշեց, որ ԱԺ երեք խմբակցության պատգամավորների մտահոգությունն այն է, որ ցածր միավորներով դիմորդն առավելություն ունի բարձր միավորներ հավաքած դիմորդի նկատմամբ:
«Ակնհայտորեն գիտելիքը ստորադասվում է շատ թույլ հիմնավորմամբ, թե առաջին հայտով դիմողներն իրենց մասնագիտության ընտրության հարցում շատ հստակ որոշում են կայացրած եղել»,- ասաց պատգամավորը:
Հիշեցնենք, որ ծնողներն ԱԺ-ի դիմաց բողոքի ակցիա իրականացնելուց հետո գնացել են ՄԻՊ գրասենյակ, որտեղ հանդիպել են Արման Թաթոյանի հետ։
Մանրամասները՝ 168.am-ի տեսանյութում
