Ռոբերտ Քոչարյանի և Սեյրան Օհանյանի պաշտպանները միջնորդել են կասեցնել քրեական գործի վարույթը և գործն ուղարկել Սահմանադրական դատարան
Այսօր Երևանի ընդհանուր իրավասության դատարանի Շենգավիթ նստավայրում դատավոր Աննա Դանիբեկյանի նախագահությամբ շարունակվում է սահմանադրական կարգի ենթադրյալ տապալման գործը:
Դատական նիստի մեկնարկից անմիջապես առաջ դատական կարգադրիչների հետ կոնֆլիկտ տեղի ունեցավ տուժողի իրավահաջորդներից մեկի մասնակցությամբ, ով վիրավորված էր, որ նստած է նիստի մասնակիցներին ու մնացած ներկաներին բաժանող միջնորմից այս կողմ՝ ոչ դատավարության անմիջական մասնակիցների շարքում:
Նիստի ժամանակ ՀՀ երկրորդ նախագահ Ռոբերտ Քոչարյանի և պաշտպանության նախկին նախարար Սեյրան Օհանյանի պաշտպանները միջնորդել են կասեցնել քրեական գործի վարույթը և գործն ուղարկել Սահմանադրական դատարան։
Այս պահին այս միջնորդությունը ներկայացնում է Սեյրան Օհանյանի պաշտպան Կարեն Մեժլումյանը։
Նիստի սկզբում դատավորը հայտնել է, որ ստացվել է տուժող Սերգեյ Եղիազարյանի ներկայացուցիչ Էդուարդ Ասլանյանի միջնորդությունը դատախազներ Գևորգ Բաղդասարյանին և Պետրոս Պետրոսյանին բացարկ հայտնելու վերաբերյալ, սակայն Ասլանյանը առողջական խնդիրների պատճառով չի կարողացել ներկայանալ այսօրվա նիստին, և միջնորդության քննարկումը հետաձգվել է։
