Ծառուկյանը ԲՀԿ հրատապ նիստում վերահաստատել է. հրաժարականներ պետք է լինեն․ news.am
Ինչպես արդեն տեղեկացրել ենք, Գագիկ Ծառուկյանի գլխավորությամբ քիչ առաջ տեղի է ունեցել ԱԺ «Բարգավաճ Հայաստան» խմբակցության հրատապ նիստ, որի ընթացքում քննարկվել են ինչպես տեղի ունեցող իրադարձությունները, այնպես էլ խմբակցության և կուսակցության առաջիկա անելիքները։ Այս մասին NEWS.am-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Իվետա Տոնոյանը։
«Նախկինում արված հայտարարություններին որեւէ ավելացնելու բան չունենք, առավել քան հստակ «Բարգավաճ Հայաստան» կուսակցության նախագահը հրատապ նիստի ընթացքում հայտարարել է, որ կառավարությունն իր աշխատանքները 100 տոկոսով ձախողել է, եւ որ արմատական փոփոխությունների անհրաժեշտություն է զգացվում նաեւ հրաժարականների տեսքով։ Տեղի է ունեցել աշխատանքային քննարկում կուսակցության նախագահի գլխավորությամբ, որեւէ հրատապության ռեժիմում որեւէ բան չի իրականացվում, հրատապ էր մեր քաղխորհրդի նիստը, որը մենք ասացինք, որ այդ օրակարգը մեզ պարտադրված է եղել, պայմանավորված երկրում ստեղծված իրավիճակով, ինչի մասին մենք արդեն իսկ հաղորդագրություն տարածել ենք»,– ասաց նա։
