«Շոկերը հետզհետե լինելու են ավելի վատը․ այսօր կորոնավիրուսն է, վաղը մի ինչ-որ նոր բան է լինելու». ԿԲ նախագահի թեկնածու
«Եթե ճիշտ եմ հիշում՝ համահայկական բանկի գաղափարը ստեղծվեց այն ժամանակ, երբ բոլորին թվում էր, որ ամեն ինչ միշտ լավ է լինելու։ Դա 2003-2007թթ. էին, երբ աշխարհը ծաղկման փուլում էր, և բոլորին թվում էր, թե ամեն ինչ լավ է լինելու։ Կյանքը ցույց տվեց, որ այդքան էլ այդպես չէ։ Իմ տեսլականը կամ իմ պատկերացումներն աշխարհի վերաբերյալ մի քիչ ավելի կոնսերվատիվ են»,- խորհրդարանում այս մասին ասաց ԿԲ նախագահի թեկնածու Մարտին Գալստյանը։
«Ես կարծում եմ, որ շոկերը հետզհետե լինելու են ավելի վատը, լինելու են ավելի հաճախ, և մենք անընդհատ բախվելու ենք այն իրականության հետ, որ, այսպես թե այնպես, առնչվելու ենք այդ շոկերին։ Ինչքան էլ ուզենամ լավատես լինել, ես կարծում եմ, որ այսօր կորոնավիրուսն է, վաղը մի ինչ-որ նոր բան է լինելու։ Եվ մեր հիմնական նպատակը ԿԲ-ում հենց դա է, որ ունենանք այն գիտելիքի պաշարը, այն մարդկանց ու տեխնոլոգիաները, որ կարողանանք ամեն եկող շոկին տալ դրան համապատասխան արձագանք»,- ասաց ԿԲ նախագահի թեկնածուն։
Անկախ պատգամավոր Արման Բաբաջանյանը հետաքրքրվեց՝ ինչքանո՞վ է ԿԲ պահպանողական գործիքակազմն ունակ այդ նոր շոկերին դիմակայել. «Իհարկե, ԿԲ-ն վարում է հենց պահպանողական քաղաաքականություն, բայց մենք հատկապես այս համավարակից հետո խոսում ենք ոչ ստանդարտ իրողությունների, ոչ ստանդարտ լուծումների մասին, որոնք մեզ անհրաժեշտ են լինելու։ Դուք ինչպե՞ս եք պատկերացնում՝ ԿԲ-ն ի՞նչ ոչ ստանդարտ գործիքներ պետք է մտածի, ներդնի, որպեսզի արդեն առկա ճգնաժամերը և Ձեր նկարագրած հնարավոր նոր շոկերը մեզ համար նվազ ցավոտ լինեն»։
Ի պատասխան՝ Մարտին Գալստյանն ասաց, որ ԿԲ ներկայիս գործիքակազմը դեռ իրեն չի սպառել. «Խնդիրների առաջացմանը զուգընթաց, բնականաբար, գործիքակազմը ևս փոփոխությունների է ենթարկվելու։ Ազնվորեն ասեմ՝ իմ խնդիրն այն է, որ այս պահի դրությամբ այն գործիքակազմը, որը որդեգրում են ինչ-որ կենտրոնական բանկեր, թե՛ քաղաքական ճնշումների արդյունքում, թե՛ իրենց համոզմունքներին խորթ, ես չեմ կարծում, որ դրանք օպտիմալ լուծումներ են»։
