Անդրե Սիմոնյանն ու Սևակ Ամրոյանը Տերյանի ստեղծագործության հիման վրա գրված զուգերգ կներկայացնեն
The Beautified Project ալտերնատիվ ռոք խմբի հիմնադիր, պրոդյուսեր Անդրե Սիմոնյանը և երգիչ Սևակ Ամրոյանը առաջիկայում երկրպագուների դատին կհանձնեն Վահան Տերյանի «Իմ խաղաղ երեկոն է հիմա» բանաստեղծությամբ գրված համանուն երգը:
«Արմենպրես»-ի թղթակցի հետ զրույցում Անդրեն ասաց, որ ավելի քան տասը տարի Սևակի հետ մտերիմ ընկերներ են: «Երբ փողոցով քայլում ենք, հաճախ զարմացած են նայում մեզ, որովհետև գիտեն, որ երաժշտական տարբեր ոլորտներից ենք: Մենք միշտ մտածել ենք միասին որևէ երգ կատարել, բայց ժամանակ և առիթ չէր ընձեռվում: Վերջերս խոսում էինք շատերին հայտնի «Տարիներ-տարիներ» ստեղծագործության մասին, որի իրական վերնագիրն է «Իմ խաղաղ երեկոն է հիմա»: Երկուսս էլ Վահան Տերյանի բանաստեղծությունները շատ ենք սիրում, մեղեդին էլ շատ գեղեցիկ է»,-պատմեց երաժիշտը:
Նրա խոսքով՝ որոշել են գործիքավորումն իրականացնել ակուստիկ կիթառներով: Համագործակցել են Adana Project-ի կիթառահար Պատրիկ Ավետիսյանի հետ:
«Երգը պարզ է ստացվել, և հոլովակն էլ պետք է պարզ ու անկեղծ լիներ: Որոշեցինք նկարահանումներն իրականացնել անտառում: Խարույկի շուրջ նվագում ենք, իսկ խարույկի ձայնն էլ յուրահատկություն է տալիս երգին»,-նշեց Անդրեն և հույս հայտնեց, որ երաժշտասեր լսարանը այն կհավանի:
Սիմոնյանը հատուկ շնորհակալություն հայտնեց հնչյունային պրոդյուսեր Սերգեյ Գասպարյանին և տեսահոլովակի ռեժիսոր Մարիամ Գևորգյանին:
Անժելա Համբարձումյան
