Փողերս հետ տվեք, ես գնում եմ. լարված իրավիճակ «Զվարթոց» օդանավակայանում
Հարյուրավոր քաղաքացիներ, որոնք այսօր՝ ապրիլի 4–ին, պետք է Հայաստանից մեկնեին Ռուսաստան, մնացել են «Զվարթնոց» միջազգային օդանավակայանում։ Այս մասին, NEWS.am-ի հաղորդմամբ, տեղեկանում ենք ֆեյսբուքյան օգտատեր Էրիկ Շահբազյանի էջից:
Վերջինս ուղիղ եթերում զրուցում է ուղևորների հետ և պատմում, թե ինչ է կատարվում այնտեղ. «Եկել ենք օդանավակայան, բայց մեզ ոչ մեկ չի դիմավորում, ասում են՝ թռիչքը չկա, բայց Ռուսաստանից ասում են՝ կա։ Հիմա չենք իմանում՝ ինչ անենք։ Բոլորը տոմսեր են գնել, քանի որ նախապես հայտարարվել էր, որ այսօր չվերթը իրականանալու է, բայց հիմա փաստի առաջ ենք կանգնել»։
Ուղիղ եթերում երևում է, որ օդանավակայանում, ուղևորների շարքերում կան նաև երեխաներ։ Տեղում հերթապահություն են իրականացնում ոստիկանները, որոնք քաղաքացիներին հորդորում են պահպանել սահմանված հեռավորությունը՝ վիրուսի տարածումը կանխելու համար։
Ավելի ուշ քաղաքացիներից մեկի և ոստիկանի միջև վեճ է սկսվել, որի ընթացքում քաղաքացին վիրավորանքներ է սկսել հնչեցնել ոստիկանի հասցեին։ Վեճ է սկսվել նաև, երբ ավիաընկերության ներկայացուցիչը մոտեցել է և ասել, որ հիմա ինքնաթիռը գալու է ուղևորներին իջեցնի և դատարկ հետ գնա Ռուսաստան, քանի որ Ռուսաստանը չի ընդունում իրենց. «Փողերս հետ տվեք, ես գնում եմ, խի՞ եք ծախում տոմսերը, համ փողը չեն ուզում տան, համ չեն թողում գնանք։ Տեղեկացրեք, որ հենց հիմա ժողովուրդը մտնում է պալասա ու թույլ չի տալիս, որ այդ ինքնաթիռն իջնի»։
