Արմեն Թավադյանի կալանքի դեմ բողոքի քննությունը կշարունակվի վաղը
Ինչպես ավելի վաղ տեղեկացրել էինք, «5-րդ ալիք» հեռուստաընկերության սեփականատեր Արմեն Թավադյանի խափանման միջոց կալանավորման որոշումը վերջինիս պաշտպանները բողոքարկել էին Վերաքննիչ քրեական դատարան: Գործը մակագրվել էր դատավոր Ալեքսանդր Ազարյանին, ում 2 անգամ ներկայացվել էր ինքնաբացարկի միջնորդություն՝ նախ՝ ՀՔԾ քննիչի, ապա՝ գործով մեղադրող դատախազի կողմից:
Առաջին միջնորդությունը դատավորը մերժել էր մարտի 6-ին: Երեկ՝ մարտի 9-ին, դատավոր Ազարյանը մերժել էր ինքնաբացարկի երկրորդ միջնորդությունը, բայց դատախազի՝ այլ նիստի ներկա լինելու հանգամանքով պայմանավորված, հետաձգել էր գործի քննությունը:
Այսօր Վերաքննիչ քրեական դատարանում՝ Ալեքսանդր Ազարյանի նախագահությամբ, տեղի էր ունեցել Արմեն Թավադյանի խափանման միջոց կալանավորման դեմ պաշտպանների բողոքի բուն քննությունը:
Մոտ երկու ժամ տևած դատական նիստից հետո այն հետաձգվել է՝ աշխատանքային օրվա ավարտով պայմանավորված։
168.am-ի հետ զրույցում Արմեն Թավադյանի փաստաբան Հովհաննես Խուդոյանն ասաց, որ միջնորդության քննությունը կշարունակվի վաղը։
Հիշեցնենք, որ «5-րդ ալիք» հեռուստաընկերության սեփականատեր Արմեն Թավադյանին մեղադրանք է առաջադրվել ՀՀ երկրորդ նախագահ Ռոբերտ Քոչարյանի ենթադրյալ աջակից Վարուժան Մկրտչյանին՝ ՀՀ քրեական օրենսգրքի 340-րդ հոդվածի 4-րդ մասի 1-ին կետով առաջադրված մեղադրանքի շրջանակներում:
Արմեն Թավադյանը ձերբակալվել էր 2019 թվականի դեկտեմբերի 24-ին: Դատարանի որոշմամբ նա կալանավորվել էր 2019 թվականի դեկտեմբերի 26-ին:
