«Սա հավերժ աշխատանք չէ, ժամանակը կգա՝ պատգամավորական մանդատը ավտոմատ ձևով վայր կդնենք բոլորս». Արթուր Մանուկյան
168.am-ի զրուցակիցն է ԱԺ «Իմ քայլը» խմբակցության պատգամավոր Արթուր Մանուկյանը:
– Պարոն Մանուկյան, թեև Ձեր թիմակիցները նշել էին, որ Սահմանադրական փոփոխությունների ակտիվ քարոզարշավը կմեկնարկի մարտի 2-ից, սակայն, որպես այդպիսին, քարոզարշավ չկա, պասիվությունը կորոնավիրուսի տարածմա՞մբ է պայմանավորված, թե՞ այլ խնդիրներ կան:
– Խնդիրներ չկան, պարզապես ԱԺ լիագումար նիստերի մեջ ենք մենք, իսկ ՀՀ վարչապետն էլ պաշտոնական այցով Վրաստանում էր գտնվում, սա խնդիր չէ, ուղղակի հետաձգում է ակտիվ փուլի, մենք կանցնենք ակտիվ փուլի:
– Դուք անձամբ քարոզարշավն անցկացնելու ի՞նչ ձևաչափ եք ընտրել:
– Գնալու եմ մարզեր, հանդիպելու եմ մարդկանց հետ, փորձելու եմ բացատրել, իմ տեսակետը կիսել մարդկանց հետ և լսել նաև նրանց տեսակետները: Այսպես աշխատելու ենք, շփվելու ենք մարդկանց հետ:
– Ի՞նչ ակնկալիքներ ունեք հանրաքվեից, 650.000 ձայն կապահովվի՞:
– Կարծում եմ՝ մենք պարտավոր ենք, ոչ միայն մենք, այլև բոլոր մարդիկ, ովքեր գիտակցում են, որ ցանկացած պետության իշխանության տերը ժողովուրդն է, պետք է ժողովուրդն իր իշխանությունն իրականացնի և այն իրականացնում է հանրաքվեների միջոցով:
– Իսկ կորոնավիրուսի դեմ Դուք ինչպե՞ս եք պայքարում, օրինակ, «Բարգավաճ Հայաստան» խմբակցության ղեկավար Գագիկ Ծառուկյանն ասում է, որ բարի մարդկանց այդ վիրուսը չի կպնում, կիսո՞ւմ եք այդ կարծիքը:
– Պայքարում եմ գիտելիքով, երկու-երեք օրվա ընթացքում գրեթե ամեն ինչ ուսումնասիրել եմ և անգամ կարող եմ դասախոսություն կարդալ: Այո, համաձայն եմ՝ կարող ենք նույնիսկ աղոթել և խունկ վառել, և վիրուսը չկպնի՝ վիրուսոլոգներն այդպես են ասում…
– Դուք ԱԺ եք եկել մշակույթի ոլորտից, օրինակ՝ ի՞նչ խնդիրներ եք տեսել այդ ոլորտում, որոնք բարձրաձայնել եք օրենսդիր մարմնում:
– Անկեղծ ասած, ակտիվ աշխատում ենք, որ «Կինոյի մասին» օրենքը խելքի բերենք և բերենք խորհրդարան, որպեսզի կարողանան լիարժեք գործել, քանի որ կինոն արվեստի կարևորագույն ճյուղերից մեկն է: Բազմաթիվ խնդիրներ են եղել կինոյի ոլորտում, անհավանական տգեղ պատմություններ, կոռուպցիա և այլն: Ինքս՝ որպես կինոյի մարդ, այդ ամենն իմ մաշկի վրա զգացել եմ, տարիներ շարունակ կինոյի ոլորտում կոռուպցիոն զզվելի սխեմաներ են եղել: Մենք փորձում ենք հարցին ինստիտուցիոնալ լուծում տալ, որպեսզի ցանկացած իշխանության դեպքում նման սխեմաներ այլևս չգործեն: Սա է պատճառը, որ օրենքն այսպես ձգձգվում է, քանի որ մենք ինստիտուցիոնալ լուծում պետք է տանք խնդիրներին:
Թատրոններում կան խնդիրներ, և հանդիպումների ընթացքում թե՛ տնօրենների, թե՛ դերասանների հետ մենք դա տեսնում ենք, որոնք փորձում ենք հավաքագրել, որպեսզի կարողանանք ճիշտ լուծումներ տալ և մարդկանց օգտակար լինել:
– Դժվար չէ՞ր արվեստի ոլորտից գալ հայտնվել Ազգային ժողովում:
– Միշտ փորձել եմ ժամանակակից արվեստի մտածողության մեջ լինել, և ժամանակակից արվեստի փիլիսոփայությունն այժմ շատ քաղաքական է: Չեմ կարող ասել, որ այդտեղ անցում չկար, բայց քանի որ այդ մտածողության մեջ բավականին երկար ժամանակ մտքերով եմ եղել, էմոցիաներով: Որ ասեմ՝ ինձ համար դժվար անցում եմ կատարել՝ չեմ կարող այդպես ասել:
– Ֆիլմում նկարահանվելու առաջարկներ երբևէ մերժե՞լ եք զուտ նրա համար, որ ԱԺ-ում եք աշխատում:
– Ֆիլմում չէ, բայց ներկայացման մեջ խաղալու առաջարկ մերժել եմ, որովհետև զբաղվածությունը մեծ է, և գլխավոր դերերին պարզապես չեմ հասցնում:
– Իսկ ափսոսանք կա՞:
– Իհարկե կա, ինչպե՞ս կարող է չլինել, բայց հուսով եմ, որ ինձ համար այս ամենը ժամանակավոր է:
– Այսինքն՝ հնարավո՞ր է՝ գա մի շրջան, որ վայր դնեք պատգամավորական մանդատը և կրկին վերադառնաք արվեստի ոլորտ:
– Այսպես թե այնպես, ժամանակը կգա, մենք ժամանակավոր ենք՝ որպես պատգամավորներ, սա հավերժ աշխատանք չէ, ժամանակը կգա՝ պատգամավորական մանդատը ավտոմատ ձևով վայր կդնենք բոլորս, և ես կփորձեմ վերադառնալ իմ ախատանքին:
– Իսկ Ձեր ընկերները Ձեզ ինչպե՞ս են ընկալում պատգամավոր ընտրվելուց հետո, որպես ԱԺ պատգամավո՞ր, թե՞…
– Իմ ընկերները, հուսով եմ, այդպես էլ կմնան, այնքան ազատ մարդիկ են, որ կարևոր չէ՝ մարդը պատգամավո՞ր է, թե՞ վարորդ: Այս առումով ես երջանիկ եմ, որովհետև ընկերներս շատ ազատ են, իմ նկատմամբ նրանց ընկալումները չեն փոխվել:
