Մահվան դեպքերի և պատահարների նվազում ունենք․ Արտակ Դավթյան
Հայաստանի Հանրապետության զինված ուժերում մահվան ելքով դեպքերն ու պատահարներն անցնող տարում նվազել են 20 տոկոսով: Այս մասին 2019 թվականի ամփոփիչ մամուլի ասուլիսի ժամանակ հայտարարեց ՀՀ ԶՈՒ գլխավոր շտաբի պետ, գեներալ-լեյտենանտ Արտակ Դավթյանը՝ հավելելով, որ ռազմական հոսպիտալներ դիմողների թիվը նվազել է 7 տոկոսով, իսկ բուժկետեր դիմողների թիվը՝ 5 տոկոսով:
ԳՇ պետը հայտնեց նաև, որ 2019 թվականին զինված ուժերում գրանցվել է սպանության և ինքնասպանության հասցնելու 14 դեպք՝ նախորդ տարվա 12 դեպքի դիմաց:
Անդրադառնալով ազգությամբ եզդի Արթուր Աջամյանի գործի հանգամանքներին, Դավթյանը նշեց, որ առայժմ որևէ բան ասել չի կարող, և հորդորեց սպասել, մինչև իրավապահներն ավարտեն քննությունը։
«Քրեական գործ է հարուցվել, ընթանում է նախաքննություն, և որևէ բան ասելուց հիմա ձեռնպահ կմնամ: Մենք ծառայողական քննություն իրականացրել ենք, բայց քանի որ նախաքննություն է ընթանում, մենք նյութերը փոխանցել ենք վարույթ իրականացնող մարմնին։ Սպասենք իրավապահ մարմինների աշխատանքին, որպեսզի հասկանանք՝ սպանությո՞ւն էր, թե՞ ինքնասպանություն»,- նշեց նա։
Հիշեցնենք` դեկտեմբերի 2-ին՝ ժամը 06:50-ի սահմանում, ՊԲ հյուսիս-արևելյան ուղղությամբ տեղակայված զորամասերից մեկի պահպանության տեղամասում մահացու հրազենային վիրավորում էր ստացել ՊԲ զինծառայող, 1998թ. ծնված Արթուր Իշխանի Աջամյանը։ Զինծառայող, 1999թ. ծնված Դավիթ Հարությունի Մելիքբեկյանը վիրավորվել է։
