«Հայաստանում այլևս որևէ մեկն ապահովագրված չէ շինծու գործերից». Էդուարդ Շարմազանով
ՀՀԿ խոսնակ, կուսակցության գործադիր մարմնի անդամ Էդուարդ Շարմազանովը Երրորդ նախագահ Սերժ Սարգսյանի դեմ հարուցված քրեական գործի և Գյուղատնտեսության նախկին նախարար Սերգո Կարապետյանի հետ առերեսման մանրամասներից տեղյակ չէ։
«Կա նախաքննական գաղտնիք, և նախաքննությունն ընթանում է, ես ասել եմ, և դա մեր կուսակցությունը հայտարարել է, որ այդ ամենը քաղաքական պատվեր է կուսակցության նախագահի և կուսակցության դեմ։ Դեռևրս նախորդ տարվա մայիսին ասել եմ, որ Հայաստանում այլևս որևէ մեկն ապահովագրված չէ, որ կարող է ձերբակալվել, որևէ մեկն ապահովագրված չէ շինծու գործերից»,- այսօր լրագրողների հետ հանդիպմանն ամփոփելով ներքաղաքական տարին՝ ասաց Էդուարդ Շարմազանովը։
Նա ընդգծեց. «Սերժ Սարգսյանը չի ընդունում իրեն առաջադրված մեղադրանքը. գործը շինծու քաղաքական մեղադրանք է»։
Ինչ վերաբերում է մամուլում եղած հրապարակումներին, որ 2008 թվականին Սերժ Սարգսյանը եղել է Արևմուտքի թեկնածուն, Էդուարդ Շարմազանովն ասաց, որ նման հրապարակումներն անհեթեթություն են, քանի որ Սերժ Սարգսյանը հայաստանակենտրոն գործիչ է, նա որևէ մեկին՝ բացի իր ժողովրդից, խոստում չի տվել։
