Մթերային խանութում դեղորայքի վաճառքը կասեցված է. ՀՀ առողջապահական և աշխատանքի տեսչական մարմին

ՀՀ առողջապահական և աշխատանքի տեսչական մարմինը վարչական վարույթ է հարուցել` հիմք ընդունելով քաղաքացու դիմում-բողոքը։

Վերջինիս համաձայն՝ Կոտայքի մարզի Արգել գյուղում գործող անհատ ձեռնարկատիրոջը պատկանող դեղատանը կասկածելի է լիցենզիայի առկայությունը։ Բացի այդ՝ դեղերը վաճառվում են խանութում մթերքի հետ մեկտեղ՝ ոչ պատշաճ պայմաններում։

Դիմումի հետքերով նշված տնտեսվարողի մոտ տեսչական մարմնի աշխատակիցներն իրականացրել են զննում՝ «Դեղերի մասին» ՀՀ օրենքով հաստատված՝ դեղերի մանրածախ իրացմանը ներկայացվող պահանջների պահպանումը, ինչպես նաև ՀՀ կառավարության 2002թ.հունիսի 29-ի 867 որոշմամբ հաստատված՝ ՀՀ-ում դեղատնային գործունեության իրականացման լիցենզավորման պահանջների պահպանումը պարզելու նպատակով:

Զննման արդյունքում պարզվել է, որ դեղերը գտնվում են տվյալ խանութի առանձնացված պահարանում, ինչը ՀՀ կառավարության հաստատած կարգի խախտում է:

Հիմք ընդունելով «Լիցենզավորման մասին» ՀՀ օրենքը՝ տեսչական մարմնի ղեկավարը 16.12.2019թ. համապատասխան գրությամբ միջնորդություն է ներկայացրել ՀՀ առողջապահության նախարարին՝ օրենսդրությամբ սահմանված կարգով և ժամկետներում քննության առնելու տվյալ ընկերությանը տրված լիցենզիայի կասեցման հարցը։