Մահացել է Եկատերինա Դուրովան
60 տարեկան հասակում երկարատեւ հիվանդությունից հետո մահացել է ՌԴ վաստակավոր արտիստուհի Եկատերինա Դուրովան: Դեկտեմբերի 13-ին այդ մասին ՏԱՍՍ-ին հայտնել է Մալայա Բրոննայայի թատրոնի մամուլի քարտուղար Մարիա Մալկինան։
«Եկատերինա Լվովնան մահացել է ծանր եւ երկարատեւ հիվանդությունից հետո»,- ասել է գործակալության զրուցակիցը՝ հավելելով, որ հուղարկավորության օրն ու վայրը կհայտարարվեն ավելի ուշ:
Դուրովան ծնվել է 1959 թվականին Մոսկվայում դերասան Լեւ Դուրովի ընտանիքում: 1980-ին ավարտել է Անատոլի Լունաչարսկու անվան Ռուսաստանի թատերական արվեստի ինստիտուտը: 1980 թվականից մինչեւ 1984 թվականը ծառայել է Տագանկայի թատրոնում: 1984 թվականից Մալայա Բրոննայա թատրոնի դերասանուհի էր:
Եկատերինա Դուրովան նաեւ հայտնի է կինոյում ստեղծած գործերով: Դերասանուհին խաղացել է «Վիսոցկի: Շնորհակալություն, որ ողջ ես», «Երկրպագուն», «Յուրայի օրը» կինոժապավեններում եւ տասնյակ այլ ֆիլմերում:
