Ազգային ժողովում մեկնարկել է հերթական նիստը. ՈՒՂԻՂ
Ազգային ժողովում մեկնարկել է հերթական նիստը: Պատգամավորները երկրորդ ընթերցմամբ կքննարկեն և կքվեարկեն ՀՀ կառավարության հեղինակած «Սահմանադրական դատարանի մասին» սահմանադրական օրենքում լրացում կատարելու մասին» և կից օրենքների նախագծերի փաթեթը:
Դեկտեմբերի 3-ին գումարված քառօրյա հերթական նիստերի օրակարգի նախագծում ընդգրկված է 40 հարց: Դեկտեմբերի 4-ին Ազգային ժողովի նիստում տեղի ունեցավ ՀՀ կառավարության հետ հարցուպատասխանը:
Դեկտեմբերի 5-ին ՀՀ Ազգային ժողովի պատգամավորները քննարկեցին 2020թ. պետական բյուջեի մասին օրենքի նախագիծը: Դեկտեմբերի 6-ին տեղի ունեցած նիստում ընդունվեց «ՀՀ 2020թ. պետական բյուջեի մասին» օրենքի նախագիծը, Ազգային ժողովի «Բարգավաճ Հայաստան» և «Լուսավոր Հայաստան» խմբակցությունները դեմ քվեարկեցին նախագծին:
Դեկտեմբերի 9-ի խորհրդարանի նիստում պատգամավորները առաջին և երկրորդ ընթերցմամբ քննարկեցին մի շարք օրենքների նախագծեր: Պատգամավորները առաջին ընթերցմամբ քննարկեցին նաև Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին օրենքի նախագիծն ու կից ներկայացված օրենքների նախագծերի փաթեթն ու Սահմանադրական դատարանի դատավորների վաղ կենսաթոշակային համակարգի ներդրման օրենքի նախագծերի փաթեթը:
Դեկտեմբերի 10-ին Ազգային ժողովի պատգամավորները առաջին ընթերցմամբ ընդունեցին Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին օրենքի նախագիծն ու կից ներկայացված օրենքների նախագծերի փաթեթը: Առաջին ընթերցմամբ ընդունեցին նաև ՀՀ կառավարության հեղինակած «Սահմանադրական դատարանի մասին» սահմանադրական օրենքում լրացում կատարելու մասին» և կից օրենքների նախագծերի փաթեթը, և որոշեցին փաթեթի քննարկումն իրականացնել հատուկ ընթացակարգով:
