«Դեռ պետք է սպասենք, թե թուրքական և ամերիկյան կողմն անդրկուլիսային բանակցություններում ինչ արդյունքի կգան». Ռուբեն Սաֆրաստյան

Արևելագիտության ինստիտուտի տնօրեն Ռուբեն Սաֆրաստյանը համոզված է, որ ԱՄՆ Ներկայացուցիչների պալատի կողմից Հայոց ցեղասպանության բանաձևի ընդունումը կարևոր նշանակություն ունի՝ ինչպես Հայոց ցեղասպանության մասին ճշմարտությունն ավելի լայն տարածելու և մեր սուրբ զոհերի հիշատակը ևս մեկ անգամ ոգեկոչելու առումով, այնպես էլ՝ քաղաքական:

«Դա մի փաստաթուղթ է, որը լայն տարածում ստացավ աշխարհում»,- լրագրողների հետ հանդիպման ժամանակ նշեց նա՝ հավելելով, որ այս փաստաթուղթն աշխարհով մեկ թուրքական քարոզչության պատասխանն է:

Ռ. Սաֆրաստյանը նկատեց նաև, որ չի կարելի անտեսել այն քաղաքական իրավիճակը, որը նպաստեց այդ բանաձևի ընդունմանը. «Այս բանաձևի ընդունումը տեղի ունեցավ թուրք-ամերիկյան հարաբերությունների վատթարացման փուլում: Ամերիկյան քաղաքական վերնախավը դժգոհ է Թուրքիայից»:

Ըստ բանախոսի՝ այդ դժգոհությունը պայմանավորված էր սպառազինությունների բնագավառում թուրք-ռուսական համագործակցությամբ, Սիրիայի հյուսիսում պայմանավորվածությունների խախտմամբ:

Խոսելով թուրքական կողմի արձագանքներից՝ արևելագետը հիշեցրեց, որ, թեև հայտարարություններ եղան Ռ. Էրդողանի, ԱԳՆ-ի, ԱՄՆ-ում Թուրքիայի դեսպանի կողմից, այդուհանդերձ, դեռևս թուրքական կողմը պաշտոնական բողոքի նոտա չի ուղարկել.

«Սա շատ կարևոր հարց է. ես կարծում եմ՝ դեռ պետք է սպասենք, թե թուրքական և ամերիկյան կողմն անդրկուլիսային բանակցություններում ինչ արդյունքի կգան: Նոյեմբերի 13-ին սպասվում է Էրդողանի այցն ԱՄՆ, որտեղ նա պետք է հանդիպի նախագահ Թրամփի հետ, ասվեց, որ գուցե այդ այցը չեղարկվի»:

Ի դեպ, Ռ. Սաֆրաստյանի կարծիքով՝ այս պահին այդ բանակցություններն ընթանում են, և հենց դրանց արդյունքները կորոշեն, թե Թուրքիայի արձագանքն ավելի կոշտ կլինի՞, թե՞ոչ», և կամ՝ այս բանաձևը կունենա՞ շարունակություն, թե՞ ոչ:

168.am-ի հարցին, թե արդյո՞ք այս գործընթացում որևէ դերակատարում ունեցել է հայաստանյան դիվանագիտությունը, նա պատասխանեց. «Ինձ համար պարզ է մի բան՝ եթե գոյություն ունի Հայաստանի Հանրապետություն, և քննարկվում է մի բանաձև, որը վերաբերում է հայ ժողովրդի կարևորագույն հարցին, առանց ՀՀ-ի այդ գործը տեղից չէր շարժվի:

Հետաքրքիր է, որ այդ պահին այնտեղ ներկա է եղել Արցախի ԱԳՆ-ն. գուցե սիմվոլի՞կ է, գուցե ո՞չ, չեմ կարող ասել»:

Ամփոփելով խոսքը՝ բանախոսը վստահեցրեց, որ ԱՄՆ-ի կողմից տրված այս մեկնարկը կունենա շարունակություն այն առումով, որ մի շարք երկրներ կհետևեն ԱՄՆ-ի օրինակին: