«Չկա դարակում պահած մի բան, որը «Լուսավոր Հայաստան» խմբակցությունից գաղտնի է պահվում». Միրզոյան
Հայաստանում չի լինելու վեթինգի մասին մեկ օրինագիծ, որով ամբողջ հարցերը վերջնական կլուծվեն, վեթինգը տարբեր իրավական կարգավորումների, տարբեր գործիքների համալիր է, որը կարող է դրսևորվել տարբեր օրենսդրական նախաձեռնություններում: Դատարանների, դատավորների անաչառությունը ապահովող գործընթացը պետք է լինի մշտական և երբեք չավարտվի: Այս մասին հայտարարել է ԱԺ նախագահ Արարատ Միրզոյանը՝ անդրադառնալով վեթինգի մասին ընդդիմադիր գործընկերների հարցադրումներին, ելույթներին:
Միրզոյանն իր ելույթը վերնագրեց «Չափազանց համառոտ ակնարկ դատաիրավական բարեփոխումների, անհասկանալի օտարածին բառով վեթթինգի գործընթացի, հասարակության ակնկալիքների և հեղափոխության ստանձնած պարտավորությունների և ԲԴԽ անդամի թեկնածության մասին»:
«Վեթինգը գործընթաց է, որը կարող է տևել 1 տարի, 2 տարի կամ 3 տարի: Վեթինգը՝ դատարանների, դատավորների անաչառությունը ապահովող գործընթացը պետք է լինի մշտական և երբեք չավարտվի: Մենք ունենք այդպիսի մարմին, որին օժտել ենք գործառույթներում, դա բարձրագույն դատական խորհուրդն է, որը պետք է համապատասխան քննություններն աներ: Սակայն ինչպես բազմաթիվ օրենքներ, գրված է եղել մի բան, իրականությունը եղել է այլ: Եվ մենք, ցավոք, պետք ոլորտ առ ոլորտ այդ շտկումներն անենք:
Մեծ հաշվով, եթե շատ ֆորմալիստական մոտեցում չցուցաբերենք, ոչ թե վեթինգ է, այլ առողջացման, զտման գործընթացի մի դրսևորում: Առհասարակ վեթթինգ ասելով պետք է հասկանանք տարբեր իրավական կարգավորումների, տարբեր գործիքների համալիր, որոնք կարող են տարբեր օրենսդրական նախաձեռնություններում դրսևորվել: Չի լինում մի օրինագիծ, որի վրա մեծ տառերով գրված կլինի «Վեթինգի մասին օրենք»:
Օրինակ, իմ հեղինակած օրենքի նախագծում առաջարկվում է կոռուպցիայի կանխարգելման հանձնաժողովին տալ մի նոր գործառույթ՝ դատավորների բարեվարքության մասին եզրակացություն անել: Սա ևս վեթինգի մի մաս է: Չկա դարակում պահած մի բան, որը «Լուսավոր Հայաստան» խմբակցությունից գաղտնի է պահվում, որը պետք է վերջին պահին կգա ու արագ կդնենք կքվեարկենք»,-վստահեցրեց Միրզոյանը:
Նա նկատեց՝ ակնհայտ է, որ հասարակությունը դատաիրավական բարեփոխումների, դատական ոլորտի առողջացման շատ լուրջ ակնկալիքներ ունի:
Միրզոյանը շեշտեց՝ հասարակությունն ունի լուրջ անվստահություն դատական իշխանության նկատմամբ, այս անվստահությունը ձևավորվել է առնվազն 2 տասնյակից ավել, ունի հիմքեր, և հիմա պետք է տան լուծումներ: «Իհարկե կան ակնկալիքներ՝ մի հրաշագործ համադարման ունենալու, որը կլինի մի փաստաթղթի տեսքով, որի վրա գրված կլինի Վեթինգի մասին ՀՀ օրենք, և այդ օրենքն ընդունվելուց հետո բոլոր հարցերը միանգամից կլուծվեն»,-ասաց ԱԺ նախագահն ու վստահեցրեց, որ այդպիսի բան չի լինելու:
Նա վստահեցրեց, որ Հայաստանում դատաիրավական բարեփոխումների և դատական իշխանության առողջացման գործընթացն իրականացվելու է բացառապես օրինականության, սահմանադրականության, իրավունքի գերակայության և ՀՀ-ի ստանձնած միջազգային պարտավորությունների շրջանակում: Այսպիսով` Միրզոյանը շեշտեց, որ վեթթինգի համար ԼՀԿ-ի առաջադրած սկզբունքներից առաջինն ընդունելի է:
Միրզոյանը նկատեց նաև, որ ոչ թե իշխանության հորդորով, այլ դատավորների ընդհանուր ժողովի արդյունքում ընդունվեց հայտարարություն, որում ֆիքսվեց ԲԴԽ-ի անգործությունը: Նա չափազանց կարևոր համարեց, որ դիսկուրսը հենց դատավորների շրջանակում է ձևավորվել:
«Եվ հենց այս հայտարարությունից հետո է, որ ԲԴԽ տարբեր անդամներ սկսեցին հրաժարական տալ՝ ըստ էության համաձայնվելով հասարակության ներկայացրեց կարծիքին: Շատ լավ է, որ ինքնամաքրման գործընթաց է ընթանում դատական իշխանությանը: Եվ մենք հիմա առաջադրում ենք թեկնածուներ, որոնք կգան համալրելու այս կազմը, որը կկարողանա աշխատել այնպես, ինչպես սահմանված է օրենքով»,-նշեց Միրզոյանը:
