Բարձրաստիճան պաշտոնատար անձանց էթիկայի հանձնաժողովը նախազգուշացում է տվել Ալեն Սիմոնյանին
Բարձրաստիճան պաշտոնատար անձանց էթիկայի հանձնաժողովը նախազգուշացում է տվել ՀՀ ազգային ժողովի փոխնախագահ Ալեն Սիմոնյանին այն բանի համար, որ անփորձությամբ գրանցել է գույք, որը փաստացի տիրապետել է: ՀՀ ԱԺ փոխնախագահը պարզաբանել է, որ փոխարենը պետք է գրանցեր այն, ինչ կար պաշտոնը ստանձնելու դրությամբ: Այս մասին Ալեն Սիմոնյանը գրառում է կատարել ֆեյսբուքյան իր էջում:
«Հարգելի ընկերներ, FIP կայքը նյութ է տեղադրել, որի վերնագիրն է «Ալեն Սիմոնյանի նկատմամբ վարչական տույժ է կիրառվել», իսկ մյուս կայքերը արտատպել են այդ վերնագիրը:
Տեղեկացնեմ ձեզ, որ Էթիկայի հանձնաժողովն ինձ ընդամենը նախազգուշացում է տվել` այն բանի համար, որ ես անփորձությամբ գրանցել եմ գույք, որը փաստացի տիրապետել եմ, փոխանակը պետք է գրանցեի այն, ինչ կար պաշտոնը ստանձնելու դրությամբ:
Բնական է, խոսք չի եղել և չի կարող լինել նախկինում ինձ վերագրված Էապես հարստանալու, կեղծ տեղեկություններ գրելու, ինչպես նաև չհիմնավորված գումարի կամ 7 մլն դրամ չհիմնավորելու մասին:
Նյութի անունը ընտրվել է հատուկ, որպեսզի տպավորություն ստեղծվի, որ ես ինչ-որ հանցանք եմ գործել, իսկ իրենք բացահայտել են:
Հայցում եմ ձեր ներողամտությունը այս թեմային կրկին անդրադառնալու համար, անում եմ սա զուտ ձեր առջև հաշվետու լինելու, ինչպես նաև հանրությանը մանիպուլյացիաներից զերծ պահելու համար»,- գրել է Ալեն Սիմոնյանը:
