«Այս ազատումների ողջ քաղաքական և մարդկային պատասխանատվությունը պետք է դրվի նախարար Արտակ Զեյնալյանի վրա». Արփինե Հովհաննիսյան
Ինչպես արդեն տեղեկացրել էինք, Վարչապետ Նիկոլ Փաշինյանի որոշմամբ՝ իրենց զբաղեցրած պաշտոններից ազատվել են ՀՀ արդարադատության նախարարի առաջին տեղակալ Արթուր Հովհաննիսյանը և նախարարի տեղակալ Սուրեն Քրմոյանը։
168.am-ն այս պաշտոնանկությունները խնդրեց մեկնաբանել ՀՀ արդարադատության նախկին նախարար Արփինե Հովհաննիսյանին, ում ենթակայության ներքո աշխատել են թե Արթուր Հովհաննիսյանը, և թե Սուրեն Քրմոյանը։
Արդարադատության նախկին նախարարը նախ ասաց, որ ցավում է, որ պետական ապարատից որակյալ ու իրապես լուրջ կադրերի արտահոսքը շարունակվում է։
«Սա արդեն որոշակի մտածելակերպ, վարքագիծ և գործելաոճ է դառնում, երբ փորձառու կադրերին փոխարինում են անհասկանալի մարդիկ։ Այս երկու ազատումների ողջ քաղաքական և մարդկային պատասխանատվությունը, կարծում եմ, պետք է դրվի նախարար Արտակ Զեյնալյանի վրա։ Շատ փակագծեր չեմ բացի, բայց սա իմ դիրքորոշումն է այս հարցի կապակցությամբ։ Վստահ եմ, որ թե Արթուր Հովհաննիսյանը, և թե Սուրեն Քրմոյանը բազմաթիվ ոլորտներում կկարողանան իրացվել և ծառայեցնել իրենց մասնագիտական ունակությունները»,- նշեց Արփինե Հովհաննիսյանը։
ԱԺ նախկին փոխխոսնակը նաև համոզմունք հայտնեց, որ Արդարադատության նախարարության աշխատանքի որակի վրա այս պաշտոնանկություններն ուղղակի անդրադարձ են ունենալու։
Հիշեցնենք, որ դեռևս շուրջ երկու ամիս առաջ 168.am-ը գրել էր, որ Ամանորի տոներից հետո կարծես թե դեռ վերջնականապես լուծված չէ նաև երկու փոխնախարարների՝ ՀՀ Արդարադատության նախարարի առաջին տեղակալ Արթուր Հովհաննիսյանի և մյուս տեղակալ Սուրեն Քրմոյանի հարցը։ Վերջիններս իրենց ամանորյա հանգիստն անցկացրել էին արտերկրում՝ Դուբայում, ինչի պատճառով նրանց հրահանգ է իջեցվել ազատել զբաղեցրած պաշտոնները։
Եվ, քանի որ վերջիններս դեռևս նախորդ իշխանությունների ժամանակներից են պաշտոնավարում, Փաշինյանի թիմակիցներն ամեն կերպ փորձում էինք խնդիրը սրել այն աստիճանի, որպեսզի նրանք հրաժարական ներկայացնեն, և փոխարենը՝ իրենց ցանկալի կադրերը նշանակվեն։ Ըստ նույն լուրերի՝ որոշ «Սորոս»-ականներ աչք ունեն այդ պաշտոնների վրա, հատկապես, որ միջազգային այդ կառույցի լուրջ հետաքրքրությունների շրջանակում է ՀՀ արդարադատության ոլորտը։
