Երևանից մինչև Իրանի սահման ձգվող ավտոճանապարհները համալրվում են ժամանակակից նշաններով
Երևանից մինչև Իրանի սահման ձգվող ավտոճանապարհները համալրվում են ժամանակակից ճանապարհային նշաններով: Այդ մասին կառավարության նիստում նշեց Տրանսպորտի, կապի և տեղեկատվական տեխնոլոգիաների նախարար Հակոբ Արշակյանը՝ ավելացնելով, որ տեղադրվում է շուրջ չորս հազար նշան: «Արդեն մոտենում ենք այդ ծրագրի ավարտին: Սակայն մի յուրահատուկ փաստ ենք արձանագրել, որ այդ նշանները գողանում են և տարբեր նպատակների ծառայեցնում: Մի քիչ ծիծաղելի կլինի, բայց որպես թոնրի կափարիչից մինչև հողագործական, ձնամաքրման բահ օգտագործում են»,- ասաց նա և նշեց, որ պետական միջոցներ են ծախսվում, և դա անվտանգության հարց է:
Վարչապետ Նիկոլ Փաշինյանը հետաքրքրվեց, թե որքան գումար է ծախսվում դրա վրա, նախարարը պատասխանեց՝ մոտավորապես մեկ միլիոն դոլար:
«Մենք մեկ միլիոն դոլարը ծախսում ենք, հետո պարզվում է, որ հարցը չի լուծվել և ստիպված պետք է նոր միջոցներ ծախսենք, դրանից հետո գողանում են և այդպես շարունակ: Դրա հետևանքով, պարզվում է, գումար չի գոյացել, որ մեկ վթարային շենքի խնդիր լուծենք կամ թոշակը բարձրացնենք: Ես ուզում եմ մեր հայրենակիցներն այս շղթան հստակ պատկերացնեն՝ սկսած ՀԴՄ չվերցնելուց, չտալուց մինչև մնացած գլոբալ հարցերի լուծումը»,- ասաց վարչապետը և նշեց, որ այս շղթայի պատասխանատվությունն առաջին հերթին կառավարությանն է, բայց չի նշանակում, որ միակ պատասխանատուն կառավարությունն է:
Նիկոլ Փաշինյանը նշեց, որ նաև սա նկատի ունի, երբ ասում է՝ քաղաքացիները տնտեսական վարքագիծը պետք է փոխեն, դա նշանակում է, որ վնաս չպետք է տան:
