«Շինծու գործ է». Լարիսա  Ալավերդյանը՝ գերեվարված Կարեն Ղազարյանի դատավարության մասին

Ադրբեջանի Գյանջա (Գանձակ) շրջանում նոյեմբերի 20-ին տեղի է ունենալու Տավուշի Բերդավան գյուղի բնակիչ Կարեն Ղազարյանի դատավարությունը, ով 2018թ. հուլիսի 15-ին հայտնվել էր Ադրբեջանի տարածքում։

ՀՀ քաղաքացուն Ադրբեջանում առաջադրված է 5 մեղադրանք՝ կյանքի և առողջության, հանրային անվտանգության, սահմանադրական կարգի հիմունքների և պետության անվտանգության, հասարակական կարգի դեմ, ինչպես նաև տնտեսական գործունեության ոլորտում հանցագործություններ գործելու հոդվածներով:

Կարեն Ղազարյանի դատավարությունն ընթանալու է ծանր հանցագործությունների համար նախատեսված ադրբեջանական դատարանում։

«Ընդդեմ իրավական կամայականությունների» հ/կ նախագահ, ՀՀ մարդու իրավունքների նախկին պաշտպան Լարիսա  Ալավերդյանը 168.am-ի հետ զրույցում  այս գործը շինծու  համարեց:

Նրա փոխանցմամբ՝ Կարեն Ղազարյանի գործը Մարդու իրավունքների եվրոպական դատարանում  է, ինչ վերաբերում է  «Կարմիր Խաչին», ապա այն հնարավոր լուծումներ է առաջարկում:

«Չեմ բացառում՝ այս գործով կարելի էր նաև ներգրավել այլազգի դատապաշտպանների, բայց, ցավոք, մենք նման փորձ չունենք: Սումգայիթի դեպքերի առիթով խորհրդային տարիներին փաստաբաններ ենք հրավիրել Լենինգրադից՝ Բաքու և Սումգայիթ գնալու համար: Գնացել ու տեսել են, որ անհնար է այդտեղ աշխատել: Հնարավոր է՝ սա նկատի ունենալով՝ երկրոդ փորձ երբևիցե չի արվել»,- նշեց Լարիսա Ալավերդյանը:

ՀՀ մարդու իրավունքների նախկին պաշտպանը չի ողջունում նաև այն խոսակցությունները, թե հնարավոր  է՝ համաձայնության գան ու անօրինական կերպով Արցախ մուտք գործած, հանցագործություն կատարած Դիլհամ Ասկերովին և Շահբազ Գուլիևին վերադարձնեն Ադրբեջան.

«Չկա որևէ ադրբեջանցի, որ Կարեն Ղազարյանի նման հայտնված լիներ հայկական կողմում: Իսկ Ասկերովի և Գուլիևի Ադրբեջան վերադարձի մասին խոսել՝ նշանակում է՝ արհամարհել միջազգային և բարոյական նորմերը: Դեմ եմ այդ զրույցների տարածում ստանալուն»,- նշեց Լարիսա Ալավերդյանը:

ՀՀ մարդու իրավունքների նախկին պաշտպանը հիշեցնում է՝ չպետք է մոռանալ, որ մարդասպանները հերոսացվում են այդ երկրում:

Հիշեցնենք, որ 2014թ. դեկտեմբերի 29-ին ԼՂՀ ընդհանուր իրավասության առաջին ատյանի դատարանի որոշմամբ Շահումյանի շրջանով ԼՂՀ պետական սահմանն ապօրինաբար հատած ադրբեջանական հետախուզական-դիվերսիոն խմբի անդամներից Դիլհամ Ասկերովը դատապարտվել է ցմահ ազատազրկման՝ մեղավոր ճանաչվելով ԼՂՀ Քրեական օրենսգրքի 316-րդ հոդվածով՝ լրտեսության, 350-րդ հոդվածի 2-րդ մասով՝ առանց պատշաճ թույլտվության ԼՂՀ պահպանվող պետական սահմանը կազմակերպված խմբի կողմից հատելու, 245-րդ հոդվածի 3-րդ մասով՝ կազմակերպված խմբի կողմից ապօրինի կերպով հրազեն և ռազմամթերք կրելու, 129-րդ հոդվածի 3-րդ մասի 1-ին կետով՝ մարդուն բացահայտ առևանգելու՝ կյանքի համար վտանգավոր բռնություն գործադրելով, 103-րդ հոդվածի 2-րդ մասի 3-րդ, 7-րդ և 14-րդ կետերով՝ սպանությունը՝ զուգորդված մարդուն առևանգելով, կազմակերպված խմբի կողմից, ազգային ատելության շարժառիթով։

Իսկ Շահբազ Գուլիևը դատապարտվել է 22 տարվա ազատազրկման՝ մեղավոր ճանաչվելով ԼՂՀ Քրեական օրենսգրքի 316-րդ հոդվածով՝ լրտեսության, 350-րդ հոդվածի 2-րդ մասով՝ առանց պատշաճ թույլտվության ԼՂՀ պահպանվող պետական սահմանը կազմակերպված խմբի կողմից հատելու, 245-րդ հոդվածի 3-րդ մասով՝ կազմակերպված խմբի կողմից ապօրինի կերպով հրազեն և ռազմամթերք կրելու, 129-րդ հոդվածի 3-րդ մասի 1-ին կետով՝ մարդուն բացահայտ առևանգելու՝ կյանքի համար վտանգավոր բռնություն կիրառելով՝ զենքի գործադրմամբ, ինչպես նաև ուրիշին պատկանող գույքի գաղտնի հափշտակման մեջ։

Անի Կարապետյան