Ինչո՞վ է աննախադեպ Սիրիա հումանիտար խումբ ուղարկելը. Արմեն Աշոտյանը՝ Զոհրաբ Մնացականյանին
«Մեր մտադրությունն աննախադեպ է նրանով, որ մենք մեր հումանիտար գործողության շրջանակն ընդլայնում ենք՝ ավելի ուղղակի հաշվի առնելով անվտանգության մարտահրավերները մեր հայրենակիցների»,- այսօր ԱԺ-ում բյուջետային քննարկման ժամանակ այս մասին ասաց ԱԳ նախարարի պաշտոնակատար Զոհբար Մնացականյանը՝ պատասխանելով ԱԺ արտաքին հարաբերությունների հանձնաժողովի նախագահ Արմեն Աշոտյանի հարցին՝ ինչո՞վ է աննախադեպ Սիրիա հումանիտար խումբ ուղարկելը, ինչպես վարչապետն էր նշել օգոստոսի 17-ի իր ելույթում։
Մնացականյանն ասաց, որ նախկին հումանիտար գործողությունները վերաբերել են հումանիտար բեռ հասցնելուն. «Այդ բեռը նպատակաուղղված է եղել մեր հայրենակիցներին, ծառայել է այդ հումանիտար նպատակներին»։
Արմեն Աշոտյանը նշեց, որ թեման նուրբ է, և հույս հայտնեց, որ այդ թեմայով փակ քննարկման հնարավորություն կունենան. «Մեր մտահոգությունները լսելու անհրաժեշտությունը օգտակար կլինի ընդհանուր գործի համար»։
