Ինդոնեզիայում տեղի ունեցած նոր երկրաշարժն առնվազն երեք մարդու կյանք է խլել
Ինդոնեզիայի Ճավա կղզում տեղի ունեցած նոր երկրաշարժն առնվազն երեք մարդու կյանք է խլել: Այդ մասին հայտնել է Associated Press գործակալությունը: Կղզու արեւելյան մասի առանձին շրջաններում մասամբ ավերվել են բնակելի տները, խնդիրներ են ծագել էլեկտրականության մատակարարման հարցում:
Ստորգետնյա ցնցումներն զգացվել են նաեւ զբոսաշրջիկների շրջանում ժողովրդականության վայելող Բալի կղզում, սակայն ցունամիի հնարավորության վերաբերյալ նախազգուշացումներ չեն արվել:
6,0 մագնիտուդով երկրաշարժը տեղի է ունեցել հոկտեմբերի 10-ի երեկոյան: Երկրաշարժի էպիկենտրոնը գտնվում էր Սիտուբոնդո քաղաքից 55 կիլոմետր հյուսիս-արեւելք ընկած շրջանում՝ 10,3 կիլոմետր խորության վրա:
Ինդոնեզիայում մինչ այժմ շարունակվում են սեպտեմբերի վերջին տեղի ունեցած ուժգին երկրաշարժի հետեւանքների վերացման աշխատանքները, երկրաշարժ, որի զոհ դարձավ ավելի քան 2 հազար մարդ, հաղորդել է «Ինտերֆաքս» գործակալությունը:
