Թրամփը պատրաստվում է 200 մլրդ դոլարի մաքսեր սահմանել Չինաստանի դեմ. Bloomberg
ԱՄՆ-ի նախագահ Դոնալդ Թրամփը պլանավորում է 200 միլիարդ դոլար ընդհանուր գումարի լրացուցիչ մաքսեր սահմանել չինական ապրանքների համար: Այս մասին հայտնել է Bloomberg-ը՝ վկայակոչելով վեց աղբյուր:
Նշվում է, որ սեպտեմբերի վեցին լրանում է այն ժամկետը, որը Թրամփը հատկացրել է գործարարության եւ հասարակայնության կողմից մաքսերի վերաբերյալ դիտողություններ հավաքելու համար: Այդ ժամկետից հետո ԱՄՆ-ի նախագահը մտադիր է անմիջապես մաքսեր սահմանել Չինաստանի նկատմամբ, որոնք կտարածվեն լայն սպեկտրի ապրանքների վրա՝ սելֆիի համար մոնոպոդերից մինչեւ կիսահաղորդչային նյութերը:
Երբ հարցազրույցի ժամանակ Թրամփին խնդրել են մեկնաբանել այս տեղեկատվությունը, նա նշել է, որ հրատարակության աղբյուրները «շատ չեն սխալվում»: Բացի դրանից, նա խիստ քննադատել է ՉԺՀ-ի իշխանություններին՝ յուանի փոխարժեքի միտումնավոր նվազեցման համար:
Հաղորդագրության մեջ նաեւ նշված է, որ նոր մաքսերի սահմանումը «լուրջ էսկալացում կդառնա» Չինաստանի եւ ԱՄՆ-ի միջեւ առեւտրական պատերազմում, հաղորդել է ՌԻԱ Նովոստին:
