Ադրբեջանում հոսանքազրկումից հետո չեն կարողանում կարգավորել Բաքվի ամբողջական ջրամատակարարումը
Ադրբեջանում հուլիսի 3-ին գրանցված լայնամասշտաբ հոսանքազրկման հետևանքով խաթարվել է նաև Բաքվի ջրամատակարարումը, ինչը չի հաջողվում վերականգնել:
Այս մասին հայտնում է ադրբեջանական «Թուրան» լրատվական գործակալությունը:
Ադրբեջանական «Ազերսու» ընկերությանը դեռևս չի հաջողվել վերականգնել մայրաքաղաք Բաքվի ամբողջական ջրամատակարարումը, ընկերությունը հույս է հայտնել, որ հուլիսի 5-ին ջրամատակարարումն ամբողջությամբ կվերականգնվի:
«Ազերսու» ընկերության պարզաբանմամբ՝ ջրամատակարարումը դադարեցվել է, քանի որ Կուր գետի ջրի մաքրման կայանները հոսանքազրկման պատճառով չեն կարողացել գործել:
Այն վայրերում, որտեղ ջուրը պոմպերի միջոցով ենթաարտեզյան հորերից է քաշվում, նույնպես ջրամատակարարում չկա:
