Եվրոպացի դպրոցականներին կարող են պարտավորեցնել երկու օտար լեզու սովորել
Եվրահանձնաժողովը առաջարկում է, որ Եվրամիության անդամ երկրների միջնակարգ դպրոցների բոլոր շրջանավարտները տիրապետեն ոչ թե մեկ, ինչպես այսօր է, այլ առնվազն երկու օտար լեզվի:
Սա Եվրահանձնաժողովի կողմից առաջարկված մինչեւ 2025 թվականը համաեվրոպական կրթական տարածության ստեղծման նախագծի բաղկացուցիչ մասն է: Այդ մասին հայտնել է կրթության, մշակույթի, երիտասարդության եւ սպորտի եվրակոմիսար Թիբոր Նավրաչիչը:
«Մենք միջոցառումներ ենք առաջարկում այն բանն ապահովելու համար, որ ԵՄ-ում բոլոր երեխաները կարողանան վաղ հասակից որակյալ կրթություն ստանալու հնարավորություն ունենալ… Մենք քննարկման ենք դնում լեզուների դասավանդման եւ ուսումնասիրման բարելավման նախաձեռնությունը: Մեր վերջնական նպատակն այն է, որ բոլոր մարդիկ միջնակարգ կրթությունն ավարտելուց հետո, բացի մայրենի լեզվից, կարողանան խոսել առնվազն երկու օտար լեզվով»,-ասել է նա լրագրողներին Բրյուսելում:
Նավրաչիչն ընդգծել է, որ խոսքն «ավելի նշանակալի բանի մասին է, քան որպես բազային լեզու անգլերենի ուսումնասիրումը, հաղորդել է ՌԻԱ Նովոստին:
