Իրանը և «եվրաեռյակը» պայմանավորվեցին պահպանել միջուկային գործարքը. Զարիֆ
Իրանի եւ «եվրաեռյակի» (Ֆրանսիա, Մեծ Բրիտանիա, Գերմանիա) արտաքին գործերի նախարարները քաղաքական համաձայնության են հասել միջուկային գործարքը պահպանելու շուրջ: Այդ մասին, ինչպես հաղորդել է ՏԱՍՍ-ը, հայտարարել է Իրանի արտաքին քաղաքական գերատեսչության ղեկավար Մոհամադ Ջավադ Զարիֆը՝ ամփոփելով մայիսի 15-ին Բրյուսելում կայացած բանակցությունների արդյունքները:
«Մենք գործարկեցինք գործընթացը: Մենք քաղաքական համաձայնության հասանք Գործողությունների համատեղ համապարփակ ծրագրի պահպանմանն ուղղված հետագա քայլերի շուրջ: Շատ բան կախված կլինի այն բանից, թե ինչ կարվի առաջկա շաբաթների ընթացքում: Մենք պետք է անհրաժեշտ երաշխիքներ ստանանք, եւ դրանից կախված կլինի՝ որոքան արագ մենք կարողանանք առաջ շարժվել»,- ասել է նա:
Իրանական դիվանագիտության ղեկավարը նաեւ գոհունակություն է հայտնել եվրոպացի գործընկերների հետ հանդիպման կառուցողական բնույթի կապակցությամբ: Նրա կարծիքով՝ միջուկային գործարքի պահպանմանն ուղղված կոնկրետ միջոցառումների շուրջ պայմանավորվածությունը կարող է ձեռք բերվել «առաջիկա շաբաթների ընթացքում»:
