Սթիվեն Սփիլբերգը դարձել է առաջին ռեժիսորը, որի ֆիլմերն ավելի քան 10 մլրդ դոլար են հավաքել վարձույթում
Սթիվեն Սփիլբերգն ամրապնդել է առեւտրային առումով բոլոր ժամանակների ամենահաջողակ կինեմատոգրաֆիստի իր հռչակը՝ դառնալով առաջին ռեժիսորը, որի ֆիլմերի միագումար դրամական մուտքերը համաշխարհային վարձույթում հաղթահարել են 10 մլրդ դոլարի նշագիծը: Այդ մասին հայտնել է The Wrap պորտալը:
Այդ ռեկորդի սահմանման գործում կարեւոր դեր է խաղացել Սփիլբերգի վերջին՝ «Թող նախապատրաստվի առաջին խաղացողը» (2018 թ.) ժապավենը: Մարտ ամսին թողարկված կինոնկարն արդեն ավելի քան 475 մլն դոլար է հավաքել ամբողջ աշխարհի վարձույթում: Հաշվի առնելով այս ցուցանիշը՝ ամերիկացու բոլոր ֆիլմերի ընդհանուր դրամարկղային մուտքերը կազմել են 10,4 մլրդ դոլար:
Ռեժիսորի՝ առեւտրային առումով ամենահաջողակ ժապավենը համարվում է «Յուրայի ժամանակաշրջանի բնայգին» (1993 թ.) ֆիլմը, որը հավաքել է 983,8 մլն դոլար: Դրան հաջորդում են «Ինդիանա Ջոնսը եւ Բյուրեղապակե գանգի թագավորությունը» (2008 թ.) եւ «Այլմոլորակայինը» (1982 թ.) կինոնկարները, որոնք համապատասխանաբար վաստակել են 786,6 մլն դոլար եւ 717 մլն դոլար:
Պորտալը նշում է, որ Սփիլբերգի առաջատարությանը դեռ երկար ժամանակ ոչինչ չի սպառնա, քանի որ նա ավելի քան 3 մլրդ դոլարով առաջ է անցել երկրորդ տեղում ընթացող Փիթեր Ջեկսոնից, որի ժողովրդականություն վայելող «Մատանիների տիրակալը» եւ «Հոբբիթ» եռերգությունները 6,5 մլրդ դոլար են հավաքել ամբողջ աշխարհում: Առեւտրային առումով ամենահաջողակ ռեժիսորների հնգյակում նաեւ տեղ են գտել Մայքլ Բեյը (ընդհանուր դրամամուտքերը՝ 6,4 մլրդ դոլար), Ջեյմս Քեմերոնը (6,14 մլրդ դոլար) եւ Դեւիդ Յեյթսը (5,38 մլրդ դոլար), հաղորդել է ՏԱՍՍ-ը:
