Ադրբեջանի բռնապետություն լինելու հանգամանքը չի անհանգստացնում Եվրոպային
Եվրոպան Ադրբեջանի նկատմամբ պատժամիջոցներ չի կիրառում, քանի որ Ադրբեջանն ունի նավթ և գազ, ինչի միջոցով Եվրոպան փորձում է չեզոքացնել իր կախվածությունը ռուսական էներգակիրներից:
Ֆրանսիական liberation.fr թերթի հետ զրույցում այս մասին նշել է ադրբեջանցի իրավապաշտպան Լեյլա Յունուսը, ով հանդիսանում է ալիևյան ռեժիմի հիմնական քննադատներից մեկը: Նա, մասնավորապես, ասել է. «Ադրբեջանը պաշտոնապես հանրապետություն է, սակայն իրականում՝ սուլթանություն: Մեր բռնապետն առաջին անգամ նախագահ է ընտրվել 2003թ.: Հիմա Ադրբեջանում արդեն չկան անկախ լրագրողներ, իրավապաշտպաններ, մեր ունեցած ցուցակում Ադրբեջանի քաղբանտարկյալների թիվը հասնում է 161-ի: Քաղբանտարկյալներից 12-ը լրագրողներ և բլոգերներ են, 1-ը` բանաստեղծ, 1-ը` արձակագիր»,-թերթի հետ զրույցում նշել է Լեյլա Յունուսը:
Լեյլա Յունուսն ընգծել է, որ Ռուսաստանում քաղբանտարկյալների թիվն ավելի քիչ է, քան Ադրբեջանում, չնայած նրան, որ ՌԴ-ն, ի տարբերություն Ադրբեջանի, ուժգին քննադատության է ենթարկվում Եվրամիության կողմից:
«Իրեն մայրցամաքի գլխավոր իրավապաշտպան կազմակերպությունը համարող Եվրախորհուրդը, որի կազմի մեջ է նաև Ադրբեջանը, հավանություն չի տվել Ադրբեջանի նկատմամբ ոչ մի պատժամիջոցի: Նոյեմբերին Ալիևը եկել էր Բրյուսել և հանդիպել Ֆեդերիկա Մոգերինիի հետ, ով հայտարարել էր, որ Ադրբեջանը և ԵՄ-ն ունեն լավ հարաբերություններ՝ չնայած այն հանգամանքին, որ մեր երկրում կտտանքների պատճառով ամեն տարի մարդիկ են մահանում»,-հավելել է Յունուսը:
«Ադրբեջանի բռնապետություն լինելու հանգամանքը չի անհանգստացնում Եվրոպային: Այսօր Ադրբեջանում իրավիճակը ծայրահեղ վտանգավոր է, մենք մոտենում ենք տնտեսական փլուզմանը:Այս ամենի պատճառով շատերը լքում են Ադրբեջանը: Մենք բազմիցս պահանջել ենք պատժամիջոցներ կիրառել Ադրբեջանի նկատմամբ, սակայն դա ապարդյուն է եղել»,- ասել է Յունուսը:
Իրավապաշտպանը հավելել է, որ Եվրոպայի կողմից պատժամիջոցներ չկիրառելու պատճառը աշխարհաքաղաքականության և ֆինանսների արդյունք է:
«Եվրոպան Ադրբեջանի նկատմամբ պատժամիջոցներ չի կիրառում, քանի որ Ադրբեջանն ունի նավթ և գազ, որոնցից կախված է Եվրոպան: Եվրոպան դրանց հաշվին ձգտում է անկախանալ ռուսական էներգակիրներից: Այդ ամենը աշխարհաքաղաքականության և ֆինանսների հարց է: Ալիևն ասել է, որ ոչնչացնելու է երկրի քաղաքացիական հասարակության բոլոր մարմիններն ու ինստիտուտները: Իշխանությունները մեզ համարում են ժողովրդի թշնամիներ: Մենք հետապնդման ենք ենթարկվում նույնիսկ Եվրոպայում»,-եզրափակել է Յունուսը:
