Հյութ, որն օգտակար է վահանաձև գեղձին

Վահանաձև գեղձն ազդում է օրգանիզմի բոլոր համակարգերի վրա. այն մասնակցում է նյութափոխանակությանը, հորմոնների արտադրությանը և կենսական այլ կարևոր գործընթացների։ Վահանաձև գեղձի աշխատանքի խանգարումն անհավասարակշռություն է առաջացնում, որն էականորեն նվազեցնում է կյանքի որակը։

Steptohealth.ru-ն գրում է, որ առավել տարածված խանգարումը հիպոթիրեոզն է, որի դեպքում վահանաձև գեղձի կողմից արտադրվող հորմոնների քանակը նվազում է, ինչն իր հերթին՝ բազմաթիվ բացասական փոփոխություններ է առաջացնում օրգանիզմում։ Կարող է զարգանալ նաև հիվանդություն, որը հայտնի է՝ որպես հիպերթիրեոզ։ Այս վիճակը կապված է վահանաձև գեղձի գերակտիվության հետ։

Առողջ սովորություններն օգնում են պաշտպանել առողջությունը և նվազեցնել այսպիսի վիճակների առաջացման հավանականությունը։

Վիտամիններով հարուստ հյութ՝ վահանաձև գեղձի առողջությունը պահպանելու համար։ Առաջարկվող հյութը հարուստ է A, B վիտամիններով, հակաօքսիդանտներով և յոդով։ Վերջինս կարգավորում է օրգանիզմի գործառույթները, որոնք կարող են խանգարվել հորմոնալ փոփոխությունների հետևանքով։ Հյութի բաղադրիչների ցանկում ներառված է գազար, որը հարուստ է բետա-կարոտինով։ Այս նյութը հարկավոր է վահանաձև գեղձի հորմոնների նորմալ արտադրության համար։ Բացի այդ՝ այս հյութն օրգանիզմը կհագեցնի B խմբի վիտամիններով՝ բանջարեղենի և մրգերի օգնությամբ, որոնք ևս հարկավոր են վահանաձև գեղձի նորմալ աշխատանքի համար։

Առանց վերոնշյալ սննդարար նյութերի՝ օրգանիզմը կորցնում է յոդն արդյունավետորեն յուրացնելու կարողությունը. անհրաժեշտ էլեմենտ՝ վահանաձև գեղձում և մակերիկամներում հորմոնների արտադրության համար։ Եվս մեկ առավելություն. առաջարկվող հյութը բարձր սննդային արժեք ունի և նվազագույն կալորիաներ է պարունակում։ Այն ոչ միայն չի հանգեցնում քաշի ավելացման, այլև օգնում է կարգավորել այն։ Այս հյութը կարող է նաև օգնել իջեցնել զարկերակային ճնշումը, արյան մեջ խոլեստերինի մակարդակը, կարգավորել նյութափոխանակության հետ կապված խնդիրները։

Բաղադրիչներ

• 1 վարունգ
• 5 ճյուղ նեխուր
• սպանախի 6 տերև
• 1 խնձոր
• 5 գազար
• 1 բաժակ կոկոսի ջուր՝ 250 մլ
• 1 կիտրոնի հյութ
• 1 թեյի գդալ սպիրուլին՝ 10 գրամ։

Պատրաստման եղանակը

• Լավ լվացեք բոլոր բաղադրիչները, կտրատեք։
• Բոլոր բաղադրիչները խառնեք բլենդերում, մինչև ստանաք միասեռ զանգված։
• Հյութն օգտագործեք նոր պատրաստված վիճակում։ Աշխատեք խմել օրվա ընթացքում 2 բաժակ։
• Ցանկալի է այն օգտագործել պարբերաբար՝ շաբաթվա ընթացքում 2-3 անգամ։

Ուշադրություն դարձրեք. այս ըմպելիքը վահանաձև գեղձի բուժման միայն լրացուցիչ եղանակ է և ոչ մի կերպ չի կարող փոխարինել բուժմանը։ Արդյունքը կարող է տարբերվել՝ կախված օրգանիզմի առանձնահատկություններից, ինչպես նաև՝ կենսակերպից։

Եթե վահանաձև գեղձի աշխատանքում որևէ շեղում եք նկատել, կարևոր է ժամանակին դիմել բժշկի օգնությանը, ստանալ ախտորոշում և համապատասխան բուժում։

Նյութը հրապարակման պատրաստեց 168.am-ը