Բժիշկը զգուշացրել է ավոկադոյի չափից շատ օգտագործման թաքնված վտանգների մասին
Չնայած ավոկադոն համարվում է «սուպերմթերք», դրա չափից ավելի օգտագործումը կարող է վնասել առողջությանը։ Այս մասին «Лента.ру»-ի հետ զրույցում հայտնել է «СМ-Клиника»-ի էնդոկրինոլոգ Անաստասիա Ալտունինան։
Բժշկի խոսքով՝ ավոկադոն բավականին կալորիական մթերք է․ մեկ միջին պտուղը պարունակում է մոտ 300–350 կիլոկալորիա և շուրջ 30 գրամ ճարպ։ Էներգետիկ արժեքով այն համադրելի է խոզի մսի լավ չափաբաժնի կամ մեկ սալիկ շոկոլադի հետ, ուստի ամեն օր մեկ-երկու ավոկադո օգտագործելը ժամանակի ընթացքում կարող է նպաստել ավելորդ քաշի առաջացմանը։
Մասնագետը նշել է նաև, որ ավոկադոն խթանում է լեղու արտազատումը, քանի որ դրա ճարպերի մարսման համար անհրաժեշտ է մարսողական համակարգի ակտիվ աշխատանքը։ Լեղաքարային հիվանդություն կամ լեղու կանգի հակում ունեցող մարդկանց դեպքում մեծ քանակությամբ ավոկադոյի օգտագործումը կարող է առաջացնել լեղապարկի կծկումներ և քարերի տեղաշարժ, ինչի հետևանքով հնարավոր են լեղային խիթ, աջ կողատակի սուր ցավ, սրտխառնոց և բերանում դառնության զգացում։
Բացի այդ, Ալտունինայի խոսքով, ավոկադոն կարող է նվազեցնել արյան մակարդման վրա ազդող որոշ դեղամիջոցների, մասնավորապես՝ վարֆարինի արդյունավետությունը։ Այն նաև որոշ մարդկանց մոտ կարող է առաջացնել փքվածություն, գազերի ավելացում, աղիների աղմուկ և որովայնային անհարմարություն։
Բժիշկը խորհուրդ է տալիս ավոկադոն օգտագործել չափավոր՝ հատկապես այն մարդկանց, ովքեր ունեն լեղապարկի հիվանդություններ կամ ընդունում են արյան մակարդման վրա ազդող դեղամիջոցներ։
