«Հրաշք կինը 2» ֆիլմի նկարահանումները տեղի կունենան սեռական ոտնձգությունների դեմ պայքարի կանոններով
«Հրաշք կինը 2» ֆիլմը կդառնա առաջին կինոժապավենը, որի վրա աշխատանքը կընթանա Ամերիկայի պրոդյուսերների գիլդիայի կանոնների պահպանմամբ, որոնք մշակված են կինոարտադրության ոլորտում սեռական ոտնձգությունների դեմ պայքարելու համար: Այդ մասին հայտնել է The Verge ինտերնետ-հրատարակությունը:
Անցած շաբաթ Գիլդիայի անդամների կողմից միաձայն ընդունված հանձնարարականները կիրառելի են կինոնկարահանումների բոլոր մասնակիցների, եւ հատկապես պրոդյուսերների, դերակատարների եւ նկարահանման խմբի մասնակիցների նկատմամբ:
Դրանք ենթադրում են, որ նախքան թիմի հետ որեւիցե կինոժապավենի արտադրությունն սկսելը, բացատրական զրույց է անցկացվելու սեռական ոտնձգությունների անթույլատրելիության շուրջ եւ այն մասին, թե ինչպես պետք է վարվել, եթե նման դեպքեր տեղի ունենան: Նշվում է, որ կինոնախագծի շրջանակներում պետք է մի շարք հատուկ ընթացակարգեր ստեղծվեն դրա որեւիցե մասնակցի անպարկեշտ վարքագծի դեմ բողոք ներկայացնելու համար:
Փաստաթղթում նշվում է, որ սեռական ոտնձգությունների վերաբերյալ բոլոր հայտարարությունները պետք է ընդունվեն «ուշադրությամբ եւ կարեկցանքով», թեեւ «հարկ է հիշել, որ նման հաղորդագրություններն անպայմանորեն չեն վկայում մեղքի առկայության մասին», քանի որ նմանօրինակ բոլոր տեղեկությունները հետաքննություն են պահանջում: Այսպիսով, «Հրաշք կինը 2» կինոնկարի ստեղծողները, որն էկրան է բարձրանալու 2019 թվականին, փաստաթղթում նշված նորմերին համապատասխանելու պարտավորություն են ստանձնել:
Ռեժիսոր Փեթի Ջենքինսի «Հրաշք կինը» ֆիլմի առաջին մասը՝ գլխավոր դերում Գալ Գադոթի մասնակցությամբ, ներկայացվել է 2017 թվականին: Կինոնկարն ստացել է կինոքննադատների դրական արձագանքները եւ ստեղծողներին ավելի քան 100 մլն դոլար է բերել ցուցադրության առաջին հանգստյան օրերին, հաղորդել է ՏԱՍՍ գործակալությունը:
