Մերկելը ԳՍԴԿ-ի հետ արագ բանակցություններ է ակնկալում կառավարության ձևավորման շուրջ
Գերմանիայում կառավարության ձեւավորման շուրջ բանակցությունները պետք է արագ անցկացվեն: Այդ մասին Բեռլինում լրագրողներին հայտարարել է Քրիստոդեմոկրատական միության (ՔԴՄ) առաջնորդ Անգելա Մերկելը: Նրա խոսքով՝ Գերմանիայի սոցիալ-դեմոկրատական կուսակցության հետ առաջին կոնսուլտացիաները կկայանան արդեն դեկտեմբերի 13-ին:
«Այն բանի գրավականը, որ մենք կկարողանանք լուծել խնդիրները երկրում եւ նրա սահմաններից դուրս, կայուն կառավարության առկայությունն է,-ասել է նա:-Ուստի մենք ցանկանում ենք վարել այդ բանակցությունները եւ կարծում ենք, որ դրանք պետք է լինեն արագ ու հիմնավոր»: Ընդ որում՝ Մերկելը կրկին ընդգծել է, որ գերակա տարբերակ է համարում հենց ԳՍԴԿ-ի հետ «մեծ կոալիցիայի» ստեղծումը: «Մենք ցանկանում ենք ձեւավորել կայուն նախարարների կաբինետ, մինչդեռ փոքրամասնության կառավարությունն այդպիսին չի հանդիսանում»,-պարզաբանել է նա, հաղորդել է ՏԱՍՍ-ը:
