Գերմանիայում թույլատրել են «Մերկելի համար կախաղանների» վաճառքը
ԳՖՀ-ի Սաքսոնիայի դաշնային երկրամասի դատարանը թույլատրել է Գերմանիայի կանցլեր Անգելա Մերկելի եւ արտաքին գործերի նախարար Զիգմար Գաբրիելի անուններով փոքրիկ կախաղանների վաճառքը:
Այս մասին հայտնել է Zeit Online-ը: Իր վճռում դատարանը նշել է, որ այդ արտադրանքը «քրեական հանցագործությու կատարելու հրապարակային կոչ» չէ: Բացի դրանից, վճռում ճշտվում է, որ օբյեկտիվ տեսակետից, նման իրերի արտադրումը եւ վաճառքը կարելի է նաեւ հասկանալ որպես «քաղաքական մահվան խորհրդանշական մաղթանք»:
Berliner Kurier հրատարակությունը հիշեցնում է, որ առաջին անգամ նման իրեր հայտնվել են 2015 թվականին Դրեզդենում Pegida հակաիսլամական շարժման ցույցերի ժամանակ: Կախաղանների վրա ամրացված էին ցուցանակներ՝ «նախատեսված է Անգելայի համար», «նախատեսված է Զիգմարի համար» մակագրություններով: Ներկայում այդ իրերը հատը 15 եվրոյով վաճառվում են որպես հուշանվերներ:
