«Միգուցե դա սնանկության կառավարչի հորեղբոր տղայի ընկերությունն է, մի հատ հասկանանք՝ ինչքանո՞վ կան կոռուպցիոն ռիսկեր». Գևորգ Գորգիսյանը՝ Վաչե Գաբրիելյանին
Այսօր Ազգային ժողովում կառավարության հետ հարցուպատասխանի ժամանակ «Ելք» խմբակցության պատգամավոր Գևորգ Գորգիսյանը «Նաիրիտի» վերաբերյալ հարցեր հնչեցրեց:
Նա ասաց, որ ինքը գրավոր ձևով կառավարությանն ուղարկել է 4 հստակ հարց ու անորոշ պատասխաններ է ստացել:
«Որքա՞ն է գործարանի պարտքն այժմ, և ի՞նչ կառուցվածք ունի այն: Պարտատերերին կատարվող վճարումները կատարելու համար սնանկության կառավարիչը պարբերաբար անցկացնում է աճուրդներ, քանի՞ աճուրդ է անցկացվել մինչ օրս, ի՞նչ գույք է վաճառվել, ի՞նչ գնով, ո՞ւմ են վճարվել պարտքից ստացված գումարները, ե՞րբ, ի՞նչ գնով է «Նաիրիտը» ժամանակին գնել այդ գույքը: Ի՞նչ բանակցություններ են ընթացել, 2009 թվականին քրեական գործ է հարուցվել «Նաիրիտում» չարաշահումների հետ կապված: Որևէ ինֆորմացիա այս գործի հետ կապված՝ ինձ չի տրամադրվել»,- հայտարարեց Գ. Գորգիսյանը:
Ի պատասխան՝ ՀՀ փոխվարչապետ Վաչե Գաբրիելյանն ասաց, որ այդ տեղեկատվությունը մեծածավալ է ու առկա է «Ազդարարում». «Հուսով եմ, որ դուք ժամանակ կգտնեք ծանոթանալ այդ տվյալների հետ»:
Գ. Գորգիսյանն ասաց, որ դրանք չկան «Ազդարարում». «Ի՞նչ գնով է ժամանակին ձեռք բերվել գույքը, կամ ո՞ւմ է վաճառվել ու ի՞նչ գնով: Ո՞ւմ են վճարվել այդ գումարներ, միգուցե դա սնանկության կառավարչի հորեղբոր տղայի ընկերությունն է, մի հատ հասկանանք՝ ինչքանո՞վ կան կոռուպցիոն ռիսկեր»:
Փոխվարչապետը խոստացավ, որ կդիմի Էներգետիկայի նախարարին՝ այդ տեղեկատվությունը Գ. Գորգիսյանին փոխանցելու համար:
