Հայաստանը 112-րդն է «Խաղաղասիրության գլոբալ ինդեքս»-ում

Հայաստանը 112-րդ տեղն է զբաղեցրել «Խաղաղասիրության գլոբալ ինդեքս»-ում (Global Peace Index): Այս մասին վկայում է Տնտեսության եւ խաղաղության ինստիտուտի (The Institute for Economics and Peace)՝ հունիսի 1-ին Լոնդոնում հրապարակված հետազոտությունը, որում վերլուծվում է 163 երկրների իրադրությունը, որտեղ ապրում է մոլորակի բնակչության 99,7 տոկոսը:

Այս ինդեքսի հիմքում ընկած է այնպիսի գործոնների հետազոտումը, ինչպիսիք են հասարակության համախմբվածության մակարդակը, մարդու իրավունքների հարգումը, քաղաքական ու տնեսական կայունությունը, ահաբեկչական սպառնալիքի մակարդակը եւ այս կամ այն երկրի մասնակցությունը մարտական գործողություններին:

Հրապարակված տվյալների համաձայն, 93 երկրներ բարելավել են իրենց դիրքերը այն դեպքում, երբ 68 երկրներ զիջել են դիրքերն այդ վարկանիշում: Հետազոտության հեղինակները նշում են դրական դինամիկան, այդ թվում՝ ելնելով դիտարկվող երկրներում պետական ահաբեկչության՝ իրենց կողմից գրանցված ցածր մակարդակից, ինչպես նաեւ Աֆղանստանից օտարերկրյա գործերի մի մասի դուրսբերման հաշվին:

Այդուամենայնիվ, զեկույցի հեղինակները նախազգուշացնում են, որ առայժմ վաղ է խոսել խաղաղության ամրապնդման կայուն միտումի մասին:

«Խաղաղասիրության գլոբալ ինդեքս»-ը հրապարակվում է վերջին 11 տարիներին: Այս տարի այն արդեն իններորդ անգամ գլխավորել է Իսլանդիան, նրան հաջորդում են Նոր Զելանդիան եւ Պորտուգալիան, որի համար այդ հորիզոնականը ամենաբարձրն է վարկանիշի գոյության ողջ պատմության ընթացքում:

Սիրիան երկրորդ տարին անընդմեջ եզրափակում է «խաղաղասեր երկրների» ցուցակը: Նրան նախորդում են Աֆղանստանը (162-րդ տեղ) եւ Իրաքը (161-րդ տեղ), որոնք վերջին հինգ տարում տեղ են գրավում հետնապահների հնգյակում, Հարավային Սուդանը (160-րդ տեղ) եւ Եմենը (159-րդ տեղ):

Եվրոպական երկրները ութ դիրք են զբաղեցնում առաջին տասնյակում, ինչը Եվրոպան դարձնում է ամենախաղաղասեր աշխարհամասը, նույնիսկ չնայած առանձին պետություններում ահաբեկչական սպառնալիքի ռեկորդային աճին: Դրական դինամիկան ձեռք Է բերվել հիմնականում կայուն տնտեսական վերելքի շնորհիվ:

Ինչպես նշում է ՏԱՍՍ-ը, վարկանիշում Ռուսաստանի դիրքն անցյալ տարվա համեմատությամբ չի փոխվել, նա զբաղեցնում Է 151-րդ տեղը: Ադրբեջանը 132-րդ տեղում է, Իրանը՝ 129-րդ: Ուկրաինան ցուցակում բարձրացել է երկու հորիզոնականով՝ զբաղեցնելով 154-րդ տեղը: ԱՄՆ-ը «Խաղաղասիրության գլոբալ ինդեքս»-ում զբաղեցրել է 114-րդ տեղը, ինչը 11 կետով ցածր է, քան անցած տարի:

«Վերջին մեկ տարին տագնապալի էր Միացյալ Նահանգների համար, որտեղ նախագահական ընտրություններին նախորդած ընտրարշավը լրջորեն պառակտեց ամերիկյան հասարակությունը»,- ասված է զեկույցում: