«Փոխվել է Շաքեի ջրվեժի ջրօգտագործման ռեժիմը». Արծվիկ Մինասյան

ՀՀ բնապահպանության նախարար Արծվիկ Մինասյանն այսօր լրագրողների հետ հանդիպման ընթացքում ասաց, որ փոխվել է Շաքեի ջրվեժի ջրօգտագործման ռեժիմը և արդեն ունենք փաստացի ջրվեժ, որտթղ այցելելու օրակարգը ևս հստակեցվել է։ Ջրվեժն աշխատելու է հետևյալ գրաֆիկով՝ մարտի 15-ից մինչև ապրիլի 30-ը՝ ժամը 11:00-17:00, մայիսի 1-ից մինչև սեպտեմբերի 30-ը, ժամը 11:00-19:00, հոկտեմբերի 1-ից մինչև նոյեմբերի 19-ը, 11:00-17:00-ը. «Ի դեպ, գրաֆիկից դուրս ժամանակահատվածում շահագործողը պարտավոր է պահպանել էկոլոգիական թողքը՝ 200լ վայրկյանում»:

««Մաքուր Հայաստան» ծրագրի մեկնարկը տրվել է, և դրա շրջանակներում կատարվել է ծառատունկ և մաքրման աշխատանքներ։ Կառավարության գրեթե բոլոր կառույցները ներգրավված են այս ծրագրում, և մենք այն համարում ենք ոչ միայն աղբից մաքրելու ֆիզիկական գործընթաց, այլև գաղափարախոսություն»,-ասաց նա՝ հավելելով, որ այս շաբաթվանից հատուկ պահպանվող տարածքներում, մասնավորապես` արգելոցներում իրականացնելու են հատուկ այցելություններ։

«Այցելելու ենք ոչ որպես գերատեսչության ներկայացուցիչներ, այլ որպես զբոսաշրջիկներ, որ օգտվենք էկոտուրիզմի բոլոր հնարավորությոիններից և արձանագրենք այն խնդիրները, որոնք առկա են, և փորձենք դրանց օպերատիվ լուծումներ տալ»։

Նա նշեց, որ նախարարությունը կառավարության ծրագրով նախատեսված ունեցել է 8 գերակա խնդիր։

«Արարատյան դաշտի ջրավազանային համակարգի վերաբերյալ ամբողջական գործողություններ են մշակվել, որը ենթադրում է 27 հիմնական ուղղություն, և պետք է Արարտյան ստորերկրյա ջրահամակարգից ծավալը նվազեցվի այնքան, որքան արտադրվում է ջուր, այսինքն պահանջարկը չգերազանցի ծավալին։ Մայիսի 15-ից սկսելու ենք ստուգումները ձկնաբուծական ընկերություններում։ Ստուգումների ընթացքում նախատեսում ենք ավտոմատ համակարգի ներդրման պահանջներ ներկայացնել, ձկնաբուծարանների խորքային հաշվառում իրականացնել»։