«Համայնքապետը պետք է սեփական եկամուտների հաշվին մեծացնի իր համայնքի բյուջեն». Դավիթ Լոքյան
«2017 թվականի մայիսի 5-ի դրությամբ համայնքներից և մասնավոր ներդրողների կողմից Տարածքային կառավարման և զարգացման նախարարություն է ներկայացվել թվով 157 ներդրումային ծրագիր, դրանցից 51-ը քննարկվել ու հավանություն է ստացել կառավարությունում ստեղծված հարթակում»,- այսօր լրագրողների հետ հանդիպման ընթացքում այս մասին ասաց ՀՀ տարածքային կառավարման և զարգացման նախարար Դավիթ Լոքյանը։
Նա նշեց, որ ներկայացված ծրագրերից շուրջ 20-ը վերադարձվել է ներդրողներին՝ հստակեցնելու, լրամշակելու և կրկին ներկայացնելու նպատակով. «Միաժամանակ, զարգացման լավագույն ծրագրեր ներկայացրած համայնքների ղեկավարների հետ ՀՀ վարչապետի մոտ տեղի ունեցած քննարկումների արդյունքում թվով 8 ծրագիր առանձնացվել են պետության օժանդակության կամ վարկավորման նպատակով»։
«Համայնքը չպետք է գոյատևի միայն պետությունից ստացած դոտացիայով, համայնքապետը պետք է մեծացնի իր համայնքի բյուջեն՝ սեփական եկամուտների հաշվին։ Այս գործընթացը շարունակվում է, և համայնքների ավագանիները քննարկում են համայնքային բյուջեներում համապատասխան փոփոխություններ կատարելու հարցերը»,- ասաց նա։
Հարցին, թե համայնքների խոշորացման դեպքում երեխաներն ինչպե՞ս են մի գյուղից մյուսը տեղափոխվելու, նա պատասխանեց, որ Կոտայքի և Գեղարքունիքի խոշորացող համայնքներում բազմաթիվ քննարկումներ են եղել, և հասկանալի է դարձել, որ անիմաստ է պահել իրարից 2,5 կիլոմետր հեռավորության վրա գտնվող դպրոցներ, որոնցից մեկում կա ընդամենը 9 աշակերտ, մյուսում՝ 19 կամ 27. «9 աշակերտ պահելով, ուսուցիչների համապատասխան կազմ չունենալով՝ այդ երեխաներին նորմալ կրթություն չի ապահովվում։ Լինում են դեպքեր, երբ 1-ին, 2-րդ և 3-րդ դասարանի աշակերտները միասին պարապում են հայոց լեզու, մյուսները՝ միասին՝ բնագիտություն. Այսպես՝ մնացած բոլոր առարկաները։ Լուծումը հետևյալն է. համայնքը և դպրոցը ձեռք են բերում լավագույն փոխադրամիջոցը՝ այդ 9 երեխային և ուսուցիչներին փոխադրելու հարևան համայնք, որտեղ ուսուցիչը կշարունակի դասավանդել։
Նա նաև նշեց, որ կլինեն աշխատողներ, որոնք կկորցնեն աշխատանքը. «Օրինակ՝ պահակը, դպրոցի դռնապանը»։
