Տրամադրված ենք 2018թ-ին վերանայել աշխատավարձերն ու կենսաթոշակները. Կարեն Կարապետյան
Կառավարությունը մտածում է բազիսային աշխատավարձի ու կենսաթոշակի բարձրացման մասին: Դավթաշենում ընտրողների հետ հանդիպման ժամանակ ՀՀԿ փոխնախագահ, ՀՀ վարչապետ Կարեն Կարապետյանը նշեց, որ իրենք տրամադրված են առնվազն 2018թ-ին վերանայել աշխատավարձերի և կենսաթոշակների հետ կապված խնդիրները:
«2017թ-ի համար չորս հայտանիշ ենք դրել` ախտորոշում, սանիտարիզացիա, պետական կառավարման համակարգի փոփոխության և որոշումների կայացման համակարգի ստեղծում և կայունացման տարի` չնայած նրան, որ 2017թ-ի պետական բյուջեում դրել ենք նաև տնտեսական աճ: Չեմ կարող ասել, որ տնտեսական աճի թիվն ինձ համար կարևոր չէ, սակայն շատ ավելի կարևոր է այդ չորս գործառույթների լուծումը, որովհետև դրանց լուծման պարագայում 2018թ-ին ունենալու ենք հաստատակամ, կայուն, առողջ աճ»,- շեշտեց Կարեն Կարապետյանը:
ՀՀ վարչապետը չբացառեց, որ աշխատավարձերի և կենսաթոշակների վերանայումը կարող է արագացվել, եթե 2017թ-ին գործընթացներն ընթանան դրական հունով: «Խոսք տալուց անպայման ուզում եմ խոսք տալ այնպիսի բան, որի տակից դուրս կգամ: Այդ պատճառով այս պահին նման բան չեմ հայտարարի», ամփոփեց ՀՀ վարչապետը` հավելելով, որ մոտ օրերս հանրության տեղեկություններ կներկայացվեն նաև առողջապահության և սոցիալական ոլորտներում բարեփոխումների մասին:
