Թուրքիան այս պահին ՀՀ-ի համար անկանխատեսելի պետություն է. Շարմազանովը` հայ-թուրքական հարաբերությունների մասին
Հայաստանը Թուրքիայի հետ առանց նախապայմանների հարաբերությունների կողմնակից է: ՀՀԿ ԳՄ նիստից հետո լրագրողների հետ հանդիպմանն այս մասին ասաց ՀՀ ԱԺ փոխնախագահ Էդուարդ Շարմազանովը: «Մենք ցանկանում ենք ունենալ կանխատեսելի հարևան և, բնականաբար, կանխատեսելի հարևանի հետ ունենալ երկարաժամկետ հարաբերություններ»,- նշեց Շարմազանովը:
Նա հավելեց, որ Թուրքիան այս պահին ՀՀի համար դեռևս կանխատեսելի չէ, որովհետև այդ երկրի բարձր քաղաքական ղեկավարությունը հրաժարվում է իրականացնել այն պարտավորությունները, որոնք նրանք ստորագրել են 2009թ-ին:
«Քանի դեռ Թուրքիայի ղեկավարությունը պատրաստ չէ, քաղաքական կամք չունի վավերացնել առանց նախապայմանների հարաբերությունները կարգավորելու արձանագրությունները, խոսել դինամիկ զարգացման մասին չենք կարող: Մեր կարծիքը հստակ է` մենք որևէ ժողովրդի թշնամի չենք համարում, բայց միևնույն ժամանակ պատրաստ չենք մեր ազգային արժանապատվության հաշվին որևէ երկրի հետ հարաբերություններ կարգավորել»,- ընդգծեց ԱԺ փոխնախագահը:
