Թուրք-գերմանական հարաբերություններում նոր սկանդալ է գրանցվել
Գերմանիայի կառավարությունը Թուրքիայի նախկին էներգետիկայի նախարար Թաներ Յըլդըզին արգելել է սահմանադրական հանրաքվեին ընդառաջ քարոզարշավ իրականացնել: Այս մասին հայտնում է թուրքական haberler.com-ը: Քարոզարշավի նպատակով Թաներ Յըլդըզի ելույթը նախատեսվել էր անցկացնել Ֆրանկֆուրտի մոտակայքում գտնվող քաղաքներից մեկի` Կելստերբախի քաղաքապետարանի դահլիճում, սակայն Գերմանիայի կառավարությունը չի թույլատրել դահլիճն օգտագործել այդ նպատակով, և չեղարկել է վարձակալման պայմանագիրը:
Թուրք-գերմանական հարաբերությունները վերջին շրջանում բավականին լարված են, և Գերմանիայի կառավարությունը ամեն կերպ փորձում է խոչնդոտել Թուրքիայի իշխող Արդարություն և զարգացում կուսակցության անդամների կողմից Գերմանիայում քարոզչական հանրահավաքների կազմակերպմանը:
Թուրքիայի նախագահ Ռեջեփ Թայիփ Էրդողանը նախօրեին քննադատել էր գերմանական իշխանություններին այն բանի համար, որ թուրք նախարարներին այդ երկրում արգելվել է սահմանադրական հանրաքվեին ընդառաջ քարոզարշավ իրականացնել: «Հեյ, Գերմանիա, դուք ժողովրդավարության հետ հեռու մոտիկ որևէ կապ չունեք: Իմացեք, որ ձեր ներկայիս պահվածքը չի տարբերվում անցյալի նացիստական պահվածքից»,- ասել էր Էրդողանը:
Թուրքիայի արդարադատության նախարար Բեքիր Բոզդաղը մարտի 2ին սահմանադրական հանրաքվեի քարոզարշավի առնչությամբ պետք է ելույթ ունենար Գերմանիայի Գագենաու քաղաքում, սակայն վերջին պահին քաղաքապետարանն արգելել է դրա անցկացումը: Քաղաքապետը հայտնել է, որ որոշումը քաղաքական բնույթ չունի: Թուրքգերմանական հարաբերությունները Welt Die պարբերականի թղթակից Դենիզ Յուջելի Ստամբուլում կատարված ձերբակալության պատճառով վերջին օրերին ավելի են լարվել:
