«Աբխազական երկաթուղու վերականգնման բանակցություններ չեն ընթանում». Աբաշիձե

Աբխազիայի երկաթուղային ճանապարհի վերականգնման հարցն անմիջականորեն կապված է Վրաստանի տարածքային ամբողջականության հետ։ Հավանաբար, միայն տվյալ համատեքստում է կարելի քննարկել այդ հարցը, սակայն ոչ մի տեղ տվյալ թեմայով բանակցություն չի ընթանում, iPress-ին հայտարարել է Վրաստանի վարչապետի՝ Ռուսաստանի հետ հարաբերությունների կարգավորման հարցերով հատուկ ներկայացուցիչ Զուրաբ Աբաշիձեն։

Նրա խոսքով՝ ընդդիմադիր «Միացյալ ազգային շարժումն» իշխանության ղեկին եղած ժամանակ ռուսական բիզնեսին է վաճառել երկրի համար կարևոր օբյեկտները։
«Ինչ վերաբերում է մեր ընդդիմությանը, ելնելով իրենց բնույթից, նրանք ամենուր տեսնում են կեղծիք, երկերեսանիություն, գործարքներ և գաղտնիքներ։

4 տարի է, ինչ նրանք այդ մասին խոսում են։ Ամենայն պատասխանատվությամբ հայտարարում եմ, որ ոչ մի բանակցություն Աբխազիայի երկաթուղային ճանապարհի վերականգնման վերաբերյալ չի ընթանում»,- ասել է նա։

Հարցին, թե արդյոք Հայաստանը հարց չի բարձրացրել Աբխազիայի երկաթուղու վերականգնման վերաբերյալ, վերջինս պատասխանել է, թե Վրաստանի կառավարությունը «ոչ մի տեղ այդ հարցը չի քննարկում»։