Կանադան ուժեղացնում է սահմանային վերահսկողությունը ԱՄՆ-ի հետ

Կանադան ուժեղացնում է հսկողությունը ԱՄՆ-ի հետ սահմանին իր Քվեբեկ նահանգում սահմանը պոտենցյալ փախստականների կողմից անօրինական կերպով հատելու հաճախացող դեպքերի հետևանքով։ Այս մասին հայտնել է կանադական խոշորագույն Toronto Star թերթը։

Կանադական CBSA սահմանային ծառայությունն ու RCMP դաշնային ոստիկանությունը իրենց աշխատակիցներին երկրի այլ շրջաններից տեղափոխում են Քվեբեկ, որտեղ ստեղծվել է ԱՄՆ-ից ներգաղթյալների ընդունման ժամանակավոր կենտրոն, հայտնել է CBSA-ի ներկայացուցիչը մամուլի ասուլիսում։

Նրա տվյալով՝ այս տարվա հունվարին Քվեբեկում ներկայացվել է ապաստան ստանալու 452 հայց, այնինչ 2016թ. տրվել էր ընդամենը 137 հայց։

Կանադայի ու ԱՄՆ-ի միջև գործում է համաձայնագիր, որի համաձայն՝ սահմանի հատումը ապաստան ստանալու նպատակով անօրինական է, քանի որ երկու երկրներն էլ միմյանց անվտանգ են ճանաչում։