«Անօրինական կերպով ԼՂ այցելած Լապշինը չի կարող արտահանձնվել որևէ երկրի». բլոգերի ադրբեջանցի փաստաբան
Այս փուլում անօրինական կերպով Լեռնային Ղարաբաղ այցելած բլոգեր Ալեքսանդր Լապշինի արտահանձնումը որևէ երկիր, որի քաղաքացին նա հանդիսանում է, անհնար է, ադրբեջանական Trend գործակալությանը հայտնել է Լապշինի փաստաբան Սաֆար Հուսեյնովը։
Նա հայտնել է, որ Լապշինի նկատմամբ հարուցված քրեական գործի հետաքննությունը շարունակվում է։
«Հետաքննության ավարտից հետո նա պետք է կանգնի դատարանի առաջ։ Դատարանի որոշման հրապարակումից հետո կարող է քննարկվել նրան այն երկրներից մեկին փոխանցելու հարցը, որի քաղաքացին է նա հանդիսանում։ Մինչ դատարանի որոշումը Լապշինը չի կարող արտահանձնվել որևէ երկրի»,- հայտարարել է Հուսեյնովը։
Փատաբանի խոսքով՝ Լապշինի ընտանիքի անդամները դեռևս իրեն չեն դիմել։
«Նրա ընտանիքը պետք է դիմի դեսպանատուն նրա հետ հանդիպումների համար, ինչից հետո ընտանիքի անդամները դեսպանության միջոցով կարող են դիմել ինձ»,- ասել է նա։
