ՌԴ-ում գործ է հարուցվել Գյումրիի 102-րդ ռազմաբազայում 470 մլն ռուբլու պարենային չարաշահումների առնչությամբ. «Կոմերսանտ»
«Կոմերսանտի» տեղեկություններով՝ Ռուսաստանի Դոնի Ռոստով քաղաքում ավարտվել է Հարավային և Կենտրոնական ռազմական շրջանների պարենի ապահովման ծառայությունում ղեկավար պաշտոններ զբաղեցրած գնդապետ Դենիս Զորինի գործի հետաքննությունը:
Վերջինս մեղադրվում է իր ծառայողական պարտականությունների չարաշահման ու խարդախություններ կատարելու մեջ։
Հետաքննության վարկածով՝ գնդապետն առնչություն ունի Գյումրիի 102-րդ ռազմաբազայի զինծառայողների համար նախատեսված պարենային գնումների հետ կապված խարդախություններին։
Վնասը, ըստ պարբերականի, կազմում է մոտավորապես 470 մլն ռուբլի։
2016թ. հունիսին 7 տարով ազատազրկվել էր Զորինի ենթադրյալ համախոհ, 102-րդ ռազմաբազայի պարենի մատակարարման ծառայության պետ Վլադիմիր Ֆիրսովը։
«Կոմերսանտի» աղբյուրներով՝ գնդապետ Զորինը, որը անցած տարվա ամառվանից պահվում է Դոնի Ռոստովի բանտում, ներկայումս ծանոթացնում է իր դեմ հարուցված քրեական գործի նյութերին։ Նրա պաշտպանությունը մի քանի անգամ միջնորդություն է ներկայացրել խափանման միջոցը փոխելու վերաբերյալ, սակայն Զորինը նախկինի պես կալանավորված է։
Գյումրիի ռուսական ռազմաբազայի զինծառայողների պարենի չարաշահումների գործի հետաքննությունը սկսվել էր 2014թ. ամռանը։
Վլադիմիր Ֆիրսովն այս տարվա հունիսի 8-ին Ռոստովի կայազորային զինվորական դատարանի կողմից դատապարտվել էր 7 տարվա ազատազրկման։ Նա ընդունել էր իր մեղքը։
Ֆիրսովն իր ցուցմունքներում նշել էր, որ յուրացման սխեմայում ներգրավված են եղել նաև Հայաստանի քաղաքացիներ։
