ANEL-ի սաները նախարար Մարտիրոսյանին ներկայացրել են երթևեկության ավտոմատ կառավարման նախագիծ
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը նոյեմբեր 23-ին այցելել է Հայաստանի ազգային ճարտարագիտական լաբորատորիաներ (ANEL) ու շրջայց կատարել կենտրոնի 4 հարկերում, ծանոթացավ ուսումնական ու գիտահետազոտական լաբորատորիաներին։
«Ուսանողին տալ որակյալ ճարտարագիտական կրթություն արդի տեխնոլոգիաներով հագեցած լաբորատորիաներում»,- այսպես է ներկայացրել լաբորատորիաների գործունեության նպատակը նախագծի համակարգող Ամալյա Մխիթարյանը։
ANEL-ը հիմնվել է 2013 թ.-ին և առավել քան 30 մասնագիտացված և ունիվերսալ ուսումնական, գիտահետազոտական լաբորատորիաներից բաղկացած առաջադեմ փորձարարական կենտրոն է:
Հայաստանի ազգային պոլիտեխնիկական համալսարանի 6 տեխնիկական ֆակուլտետների ուսանողները հնարավորություն ունեն կրթական գործընթացում աշխատել ուսումնական ստենդերի վրա` իրենց ստացած տեսական գիտելիքները կատարելագործելով նաև գործնական լաբորատոր աշխատանքով։
ANEL-ի խնդիրն է ամրապնդել Հայաստանի պետական ճարտարագիտական համալսարանի կրթական կարողությունները` բարելավելով ու համաշխարհային չափորոշիչներին համահունչ արդիականացնելով կրթական և հետազոտական լաբորատորիաները:
Վահան Մարտիրոսյանը բարձր է գնահատել ANEL-ի նշանակալի դերը համալսարանի ուսանողների ուսումնառության ընթացքում և հույս հայտնել, որ այստեղ կզարգանան նորարարական գաղափարներ ու ինժեներական լուծումներ։
Նախարարը քննարկել է նաև հնարավոր համագործակցության հեռանկարները` հետաքրքրվելով, թե ինչպիսի գաղափարներ ունեն ANEL-ի սաները նախարարության գործունեության ոլորտներում տեղի ունեցող գործընթացներն ավտոմատացնելու համար։
Այդ առումով հետաքրքրական էր ներկայացված ճանապարհային երթևեկության ավտոմատ կառավարման նախագիծը։ Վահան Մարտիրոսյանը նաև ընդգծել է, որ այս կառույցն օգնության է գալիս լրացնելու բարձր տեխնոլոգիաների ոլորտում գործող հայաստանյան ընկերություններում մասնագետների պակասը։
