Դավիթ Յանի Findo խելացի որոնողական համակարգն արդեն իրականություն է

ABBYY ընկերության ղեկավար հայազգի Դավիթ Յանն իր ֆեյսբուքյան էջի միջոցով տեղեկացնում է, որ 2.5 տարվա աշխատանքից հետո թողարկվել է Findo.com խելացի որոնողական համակարգը:

Համակարգի ստեղծմանը նպաստել ու աշխատանքներին մասնակցել են թվով 16 ինժեներներ՝  արհեստական ինտելեկտի, որոնման, բջջային տեխնոլոգիաների ու ամպային լուծումների ոլորտներից:

Այս համակարգի միջոցով հնարավոր է գտնել փաստաթղթերն ու անձնական տվյալները: Համակարգը կօգնի գտնել անձնական նամակները, ինչպես նաև այնպիսի փաստաթղթեր, որոնց անունը չեք հիշում:

Findo-ն իր տեսակով բացառիկ համակարգ է, քանի որ հասկանում է մարդկային լեզուն: Առայժմ համակարգը հասկանում է միայն անգլերեն լեզուն, սակայն հետագայում նախատեսվում է նաև ավելացնել այլ լեզուներ: Համակարգի միջոցով հնարավոր է ամպային պահոցներում գտնել տարբեր փաստաթղթեր:

Առայժմ համակարգը թույլ է տալիս ֆայլեր փնտրել Dropbox, Gmail, Outlook, Google Drive, Yahoo, Evernote և Exchange ծառայություններում, սակայն հետագայում այս ցանկը կընդլայնվի:

Findo-ն այժմ ներկայացված է ProductHunt.com կայքում: Այստեղ կարող եք քվեարկել և թողնել ձեր մեկնաբանությունները համակարգի մասին:

Սիրարփի Աղաբաբյան