«Եթե այդպես լինի, բոլորը կթողնեն-կգնան». Արմեն Երիցյան
«Ստեղծվել է հանձնաժողով, բոլոր նախարարություններից, գերատեսչություններից ընդգրկվել են: Արտակարգ իրավիճակների նախարարությունից ևս ընդգրկված են հանձնաժողովում: Այսօր արդեն եղավ կառավարության որոշումը. համապատասխան գումարներ կհատկացվեն, գործընթացն արդեն սկսվել է»,- այս մասին այսօր կառավարության նիստի ավարտից հետո լրագրողների հետ զրույցում ասաց ՀՀ արտակարգ իրավիճակների նախարար Արմեն Երիցյանը՝ անդրադառնալով Արթիկում տեղի ունեցած ջրհեղեղին: Նա նշեց, որ հենց սկզբից իրենք եղել են դեպքի վայրում, տրվել է գնահատական, և աշխատանքներն ակտիվ կշարունակվեն:
Ապրիլյան ռազմական գործողությունների ընթացքում առաջնագիծ մեկնած ԱԻՆ աշխատակիցներից մեկը վերադառնալով՝ պարզել է, որ ինքն ազատված է աշխատանքից: Այս առնչությամբ Արմեն Երիցյանն ասաց, որ Արտակարգ իրավիճակների նախարարությունը զինվորական ստորաբաժանումներ ունի. «Յուրաքանչյուրն իր առջև դրված խնդիրներն ունի, և ոչ ոք իրավունք չունի առանց իր հրամանատարի թողնել և գնալ: Եթե այդպես լինի, բոլորը կթողնեն-կգնան: Մենք մեր առջև դրված խնդիրներն ունենք»:
Անդրադառնալով կոռուպցիայի դեմ պայքարի խնդրին՝ լրագրողներից մեկը հիշեցրեց, թե «Հետքը» տեղեկություն է հրապարակել, որ ֆինանսների նախարար Գագիկ Խաչատրյանի որդիները Լոս Անջելեսում բնակարան են վաճառում: Արմեն Երիցյանն ասաց, որ այդ առիթով ոչինչ չի կարող ասել. «Իրեն հարցրեք»:
