«Այդ տեղն ունեցողները կհատկացնե՞ն իրենց այդ տեղը, թե՞ չէ, դա արդեն իրենց որոշելիքը չէ». ՀՀԿ-ական պատգամավորների պատասխանը՝ Օսկանյանին
Ինչպես հայտնի է, այսօր տեղի է ունեցել պատգամավոր Վարդան Օսկանյանի ստեղծած «Համախմբում» կուսակցության առաջին համագումարը, որտեղ կուսակցության նորընտիր նախագահ Վարդան Օսկանյանը հայտարարել է, թե իրենք իշխանությունը վերցնելու հայտ են ներկայացնում:
168.am-ի հետ զրույցում ԱԺ ՀՀԿ խմբակցության ղեկավար Վահրամ Բաղդասարյանը հաջողություն մաղթեց Վ. Օսկանյանին և նրա կուսակցությանն այդ գործում: «Իշխանութունը չեն վերցնում, ընտրություններով կարողանում են համախմբում իրականացնել և գալ իշխանության: Եթե կկարողանան, հաջողություն նրանց»,- նշեց Վ. Բաղդասարյանը՝ չցանկանալով իր կարծիքն ասել՝ կկարողանա՞ն արդյոք, թե՞ ոչ:
Մեզ հետ զրույցում ՀՀԿ խմբակցության քարտուղար Գագիկ Մելիքյանը նշեց, որ առաջիկա խորհրդարանում ինքը չի տեսնում Վ. Օսկանյանի կուսակցությանը:
«Թե ո՞ւմ տեղն են իրենք ցանկանում զբաղեցնել, իրենք պետք է որոշեն, իսկ այդ տեղն ունեցողները կհատկացնե՞ն իրենց, թե՞ չեն հատկացնի, դա արդեն իրենց որոշելիքը չէ»,- նշեց Գ. Մելիքյանը:
Մեր այն հարցին, թե՝ ինչո՞ւ չեք տեսնում նրանց առաջիկա խորհրդարանում, Գ. Մելիքյանն այսպես պատասխանեց. «Չեմ տեսնում, որ նրանք լուրջ գաղափարախոսություն են ներկայացնում, որ կարող է՝ ժողովուրդը գնա իրենց հետևից»:
